احســب الدنيــا مثــل امــي !! ازعلــها وتراضيــني ..!!

شهقت ومن الخوف تميت ادور في الغرفه بدون هدف .. فتحت الليت وفتحت قفل الباب بسرعه .. شفت تركي ووراه غايوه وحاطه صبعها في حلجها .. شكلها خايفه ..
تركي معصب : هالكـــثر رقاااااااد ؟.؟
قلته وانا القط انفاسي : ما ادري .. محد قعدني ..
دز غايوه داخل الغرفه .. والتفت علي ..
قال لي : ان قفلتي باب الغرفه مره ثاانيه مب احسن لج .. " وراح "
طالعت غايوه بنظرات ودخلت الحمام وتوضيت وصليت العصر والمغرب وقعدت اقرى قران لين ما أذن العشا لان كان ربع ساعه ويأذن .. وصليت العشا ورحت الصاله ..
امي : اسمع صوت صريخ تركي .. شمسويه ..
رفعت راسي وانا انفخ :اوووف يعني هذا من متى ما صرخ ..
خالي يحاول يكسر الجو : هالكثر رقااد ..
قلت له : والله ما حسيت بروحي .. رقدت رقااد مب صااحي ..
امي : والحين شنو اللي بيقعدج للجامعه ..
قلت لها وانا اطلع التلفزيون : بكره اجازه ..
امي : وليش اجازه .. وانتي كل ما بغيتي تروحين تقولين اجازه ..
عصبت عليها لانها تطلع اشاعه عني : يمه شفيـج .. بكره الجمعه ..
امي سكتت ..
خالي : هههههههههههه شفيج فاطمه .. شوي شوي على بنتج ..
امي : ما قلت شي .. هذا عشان مصلحتها ..
كنت بروح غرفتي بس ادري بلاقي غايوه عابده الكتاب تدرس .. رحت المطبخ ادور لي شي اكله .. فتحت الثلاجه لقيــتهااا فااااااااضيه .. مافيها الا خضره .. رحت الصاله وانا انافخ ..
امي : شفييـج تنافخين ..
قلت لها وانا اخذ الجهاز من يد خالي : الثلاااجه فااضيه وانا يوعااانه .. اعنبوه عمري ما شفتها مترووسه .. ياربي شهالقحط ..
خالي يحاول يسحب الجهاز من يدي وانا اسمع امي شتقول
امي : لا قحط ولا شي .. كاهو اخوج رايح الجمعيه يجيب الاغراض اللي وصيته عليهم ..
شقهت وانا امط الجهاز من يد خالي : وليـــــــــش ما قلتو لي عشان اكتب لستة الحلويات اللي ابيهم ..
امي : مافي حلويات ولا شي .. غايه طلبت بس اخوج ما رضى ..
قلت وانا اتصارع مع خالي على الجهاز : يا ربي هو على كل شي مب راضي هالزطي (بخيل )
مطيت الجهاز بكل قوتي من يد خالي وخالي هده وطحت على امي ..
امي : ويــه شفيــج ..
قلت لها وانا اعدل قعدتي : لا ولا شي..
وخالي يطالعني وميت من الضحك : هههههههههههههههههه الحين الجهاز كان عندي تاخذينه ليــش ؟
طالعته وانا كاتمه الضحكه : ابي افر عن المباراه ..
خالي : جيبي .. هاي العربي والسد يلعبوون ..
نقزت عنده : ان شالله الســـــــد يفوووووووز ..
خالي : لا ن شالله العربي .. عشان اذا فاز العربي بيلعب مع الريان ..
قلت له وانا مب فاهمه شي : وانزين ..
قال لي : السد اذا لعب مع الريان بيفوز عليه .. اما اذا مع العربي في احتمال الريان يفوز ..
قلت له وانا حاطه يدي على خصري : وانت تشجع الرياااااااااان ؟؟
قال وهو رافع راسه : وبكر فخر....
قلت له : وييييييي امحق ما اخترت ..
خالي : هاااا ؟
ضحكت : هههه شنووو ؟
خالي : الريان احسن من السد ..
قلت وانا ارفع يدي : قووم زين ..
خالي : شكلج ناويه تتسطرين اليوم ..
قلت له وانا ابي ازيد حجي : ليش خالي ؟
خالي : لا تقولين لي خالي ..
قلت له وانا مستغربه : ليـش تبريت مني ؟؟
خالي : لا تكبريني جي .. انا كبر اخوج .. انتي شتقولين حق اخوج ؟
قلت له : تركي ..
خالي : قولي لي مشاري ..
قلت وانا مستغربه : عاادي ..؟؟
قال لي : لو مب عادي ليش انا قلت لج قولي لي مشااري حااف..
قلت له :بس انا اقول حق تركي ترووك .. >> عشان يخليني اقول له مشاريوه
قال لي وهو يضحك : تبيـنه يدوووس في بطنج ..
ضحكت على تعليقه .. واللي خرب علينا .. هادم اللذات تركي ..
قال لي وهو شايل الاكياس : شيليهم ..
رحت اركض انادي غايوه وجينا نشيل الاغراض ونحط اللي ينحط في الثلاجه في الثلاجه واللي ينحط برع برع ..واستانست يوم شفت تركي جايب حلويات .. اخذت الكيس الي فيه كوافي ورحت اركض كأني ياهل حق تركي .. أسأله اذا هذا لنا او له .؟
قلت له وانا الهث : تركي .. هذا حق منـوووووو؟
تركي طالعني وطالع الكيس : حق غايوه .
شهقت : وليـــــش ما جبت لي ؟؟
تركي : خل ينفعج الرقااد ..
حذفت الكيس ورحت اركض غرفتي .. ووقفتني صرخته ..
تركي : تعــــــالي ..
قلته وانا متكتفه : خيــر ؟
قالي : شيليه وعطيها اياه في يدها ..
قلته له وانا متخصره : نــــــــــعم ؟؟
تركي : ونعااامه ترفسج في بطنج .. شيليه اقو ل لج ..
بيني وبينكم خفت .. بس عااندت وقلت له: مــب شايلته ..
ورحت اركض غرفتي قبل لا يطرش لي نعااله .. وسمعته يتحرطم ويتوعد مادري شيقول .. قعدت على السرير وانا اناافخ من التعب .. طالعت تلفووني .. لقيت مكالمه >> انتو لو تشوفووون تلفووني بتصيحوون .. لانه بيكسر خاطركم .. تلفوني اثــري من قلب .. هاي اللي بو كيمرا وحده اللي يصور صوره فوتوغرافيه مب فيديو .. آآه يالقهر .. بعد مب انا شاريته هذا هديه نجاحي من لطوف فديتها شرت لي وشرت لها نفس الجوال ..المهم شفت المكالمه من لطوف..
" لطوف هذي بنت جيرانا وحبيبه قلبي.. وهي رفيجتي الروح بالرووح .." اتصلت لها ما ردت .. بعد دقيقه اتصلت لي .. كله تسوي هالحركه مادري شبتستفيـد ..
لطوف : هــلا بحيااتي ..
رديت : هلا بعمري ..
لطوف : شخباارج .. شعلومج ..
قلت : الحمدلله بخيـر .. انتي شخبارج .. شمسويه بدووني ؟
لطووف : والله اجازه ممله .. صج انها يومين .. بس ملل .. مافي الا انا و حمد اخوي اللي في البيت .. امي كل يوم مسافره من بلاد لي بلاد ..
... على فكره .. انا ولطووف بدوون ابهاات .. هي ابوها متوفي.. وانا ابوي مطلق امي. . وامها لبنانيه وكل شهر تسافر بلاد .. لان ابو لطيفه عنده ثرووه كبيــره ويوم مات ورثوها هم الثلاث.. امها وهي واخوها ....
قلت لها : ليش ما تسافرين معاها ؟
لطوف : والله انتي تدرين ان عندنا امتحانات .. ليش تسألين ..
قلت لها بصدق : والله والله لو انا منج . وعيشتي عيشتج .. والله لا اترك الدراسه واطيــر مع امج ..
ضحكـت : ههههههههههه انزين في الصيف بنساافر .. بس مـلل ..
قلت لها : انا ولا عمري ركبت طياره تصدقـين ؟
لطوف : ايه ادري ..
قلت لها : شدراااج ..
لطوف : قلتيلي ..
قلت لها : المهم وين بتسافرون هالسنه .. ماليزيا والا لندن والا فرنسااا ؟
ما سمعت ردها لاني اسمع صرراخ عندها وهواش مادري شالسالفه ..
قلت : الووو .. الوووو لطووووف ..
الا يصدمني ذااك الصووت الخــشن .. ما عرفت شاسوي .. توهقت ..
.......... : الوو .. من ؟
قلت بصوت يرتجف : من ؟
قال لي : انتي منو .. انا حمد اخو لطوف ..
قلت له : انزين عطني لطيفه ..
قال لي : انا بدال لطيفه ما يصيــر ؟
قلت له : لا ما يصير .. عطني لطيفه ..
قال لي : من انتي .. انتي سـاااره ؟
استغربت انه عرف اسمي : ايه شدراااك .؟
ضحك مادري ليش : ههههههههههههههه .. لطوف ما عندها سيره في البيت غير سيرتج ..
قلت بدون ما احس : فديــــتها ..
قال لي : وانا ؟؟
انتبهت اني قاعده اكلم ريال من مساعه : انت ما تستحي ؟؟ عطني لطوف والا اسكر ..
ضحك : هههههههههههههه من مساعه مطيحه معاي سالفه والحين تقولين لي ما تستحي .. انتي اللي ما تستحين ..
عصبت عليه وسكرت في ويهه .. ورد اتصل ما ادري هاي لطوف والا اخوها .. صج طلع قليل ادب ..ياني مسج .." ساروه سووري والله ردي انا لطووف فديتج " واتصلت رديت بسرعه ..
قلت : هذا اخووج ما يستحي ؟
قالت لي : والله سوووري سااره .. قال لي اسوي له عصير .. وسحب الجوال مني وانـ
قاطعتها لان ما يهمني العذر : مب مهم .. قولي لي هاي اخووج شكبر ؟
لطوف : ليــش ..؟
قلت لها : بس اسأل ..
قالت لي : عمره 23 سنه .. ويشتغل في شركه ابوي وهو عريض وابيض وشعره فاتح نفسي عيونه فاتحه على امي واسمه حمد بن منصور الـ .. و ..
قاطعتها : ايــه بس بس .. انا ما قلت لج قولي لي مواصفاته .. انا كنت اسألج عن عمره ..
لطوف : عشان ما تكثرين من الاسأله ..
قلت لها : صـج عيونه فاتحه وشعره فااتح ..
قالت لي : ايه والله العظيـم .. حتى هو كاره هالشـي لان ربعه يعايرونه يقولون له لبناني ..
قلت لها : ياازينها من معايره .. عادي لبناني .. مب سبه ..

قالت لي : عاد هو يبي يفتخر انه قطـري وولد قباايل .. ما تسوى عليه امه لبنانيه ..هههه
ضحكت : ههههههه انزين ما قلتي لي وين بتسافرون هالسنه .؟
لطوف : مادري يمكن لبنان او المانيا وبعدها فرنسا نفس العام ..
قلت لها : ايه العام رحتو المانيا وعقبها فرنسا .. روحو هالمره فينا عشان خااطري ..
ضحكت : يعني احنا بنرووح انتي تحددين البلاد ليـش؟
قلت لها : يالبــــااايخه .. اصلا اذا انتي رحتي كأني انا رايحه ..لان انتي ما تقصرين ..ترويني صور بالفيديو وصور فوتوغرافيه ..احس اني رحت معاكم ..
قالت لي : فـــــديــــــــــــتج والله ساروه ودي تروحين معانا .. جربي هالسنه تقولين حق امج ..
قالت لها وانا اضحك لان كل سنه تقول لي نفس الكلام وانا اقول لها نفس الكلام : يعني تبيني اعيد لج اسطوانة كل سنه ..
تترجاني وكأن الشور بيدي : عااد حاااولي .. والله اني بطير من الونااسه اذا جيتي ..
قلت لها : حبيبتي تركي ما بيرضى وامي ما بترضى .. فيهم عقد هذيلا الحمدلله والشكـر .. سمعت حد يناديني ..
قلت لها بسرعه : لطووف اخليج الحين بروح حد يناديني ..
قالت لي : اوكي باي ..
قلت لها : بااي ..
ورحت اركض برع لقيتهم كلهم يتعشون جان ارز ويهي واتعشى معاهم .. لقيت تركي يطالعني بنظرات ..
طالعته وقلت له : شـنو ؟؟ شفيك جي تطالعني ؟؟
قال لي ولقمته في يده : تكلمي عدل ...
تميت ساكته واكل ..
امي : ليش شصاير فيكم بعد ؟
قال لها : ولا شي ..
وقمت ..وسمعت أمي تقول : زين جي سديت نفس اختك...
وقال : والله ما قلت لها شي .. خل هي تعدل اسلوبها هالخايس ..
وما سمعت الباقي لاني وصلت غرفتي ..
وشفت تلفوني و لقيت مكالمتين ..
طالعت الرقم .. ثنينهم من رقم غريب ما اعرفه .. واتصلوا مرع ثانيه ورديت..
قلت بصوت واطي : الوو ..
تخرعت بصوت خشن : هلا ساره ..
استغربت انه عرف اسمي .. ولا بعد انا هالصوت سامعته قبل ..
قلت : منــو ؟
قال لي : افاا ما عرفتيني ؟؟
قلت له : وانا شعرفني فيـك ... شتبي انت مغلط ..
وتوني بسكر الا اسمعه يقول : انا اخووو لطيفه حمــد ..
شووووفو السباله لطووف عطته رقمي ..
رديت بسرعه وقلت له : خيــر ؟
قال : لا بس بغيت اعتذر .. لاني بصراحه غلطت عليج وانا آسف ..
قلت له بسرعه : عذرك مب مقبوول .. يلا بااي ..
قال لي بسرعه : لا لا ارجوووج تمي على الخط ..
قلت له : خير شتبـي ؟؟
قال لي : ابيج تسامحيني ..
قلت له : وإذا ما سامحتك ..؟
قال : بانتحر ..
ضحكت على سخافته : ههههههههههه انتحر .. أنا مب مستفيده شي منك غير ملاغتك ..
قال لي : افااا انا ملغ ..؟
قلت له : ايه ..
قال وهو يتمسكن : انا الحين متصل اعتذر لج وانتي بهدلتيني ..؟؟ ليش جي ..
قلت له : والله اللي يبي يعتذر يعتذر باحترام مب بقله ادب .. ولو قلت حق لطوف انك معتذر لي منها جان قبلت اعتذارك ..
قال لي : زين اقبلي ..
قلت له وانا اتدلع لان عجبتني السالفه: لا .
قال : بالطقااااااق ..
استغربت من كلامه وانا ماسكه الضحكه : يــــــــــــه .. انت متصل تكحلها والا تعميها ..
قال : والله انا متصل اعتذر بس انتي مب ويه اعتذاار ..
قلت له : والله انت قليل ادب .. والله يعين لطووف عليك ..
قال : ليـش هي زوجتي ؟
قلت له : انا بسكر الحين بااي .
قال : لالا انا استانست معااج خلينا نتم اكثر .
قلت له : حــمد استح على ويهك وسكر ..
قال : الله يا زين اسمي يوم تقولينه ..
جان استحي واسكر في ويهه ..بصرااحه وبيني وبينكم استانست يوم كنت اكلمه لكن عيب اللي اسويه ولازم ما اكلمه مره ثانيه ..بس لو هو اتصل برد بشوفه شنو يبي .. وقطعت غايوه علي افكااري ..
غايوه تفتح الباب بدفاشه العالميـن : تركي متحلف فيـج يالعنز ..
قلت لها: عنز انتي.. وليش يتحلف فيني بعد انا شمسويه ..
غايوه : ليش تحذفين حلوياتي وماتعطيني ايه ..
قلت لها : ياااسلااام..
رفعت يدها وكأنها مستسلمه : انا مالي خص هو جي قال ..
كنت بانزل بتفاهم معاه بس اللي وقفني رنه جوالي .. وكان يايني مسـج .. نقزت على السرير وحسيته انكسر .. لان هو واقف على خشبتين بعد انقز عليه ..المهم طالعت المسج وكان المرسل هو .. لانه من نفس الرقم . قريت المسج " أنا آآآآآآآسف يالغاليه .. وما كان قصدي اغلط عليــج.. هااا شرايج فيني .. اقبلي اعتذاااري عااااد " ابتسمت وظميت الجوال بيدي ..غايوه بفضول : منــــــــــــووو؟
قلت لها: مطرشين لي والا مطرشين لج ..؟
قالت : فيني فضوول ..
قلت لها : رقدي رقدي .. بكره ورااج امتحااان ..
غايوه خافت : ايه صـج لا براجع لي كم كلمه وبعدين برقد ..
قلت من كل قلبي : الله يوفقج ..
غايوه وهي تدور كتابها : آآآآآآآآآآميــن .. ابي اخذ نسبه مـــب اقل من ال90 % ..
قلت لها : شدي حيلج وان شالله تجيبينها ..
خذت كتبها وراحت .. وطرشت مسج حق حمد " لا عادي الشيخ " وتميت انتظر منه رد مادري ليـش ؟ وعقب طرش " عاادي اكلمج الحيــن " خفت مادري ليش . يمكن عشان اللي اسويه غلط .. بس طرشت له مسـج " انا بناام .. بكره وراي جامعه " وعقب شوي طرش لي " اذا ما كلمتج الحين ما بودي لطوف الجامعه " يــــــه شنو هاي يتسهبل .. وتوني بطرش له مسـج الا رصيدي ما يكفي حق رساله وحده .. مــت من القهر .. وشوي واتصل .. تميت متردده ارد والا لا .. عقب فتره رديــت ..
قلت بصوت واطي كأن خايفه حد يسمعني : الـووو .؟
حمد : هلا والله ..
قلت له بجديه : شتبي ؟
قال : افااا . مب تونا متراضيـين ..؟
قلت له : ايه خلاص .. لا تتصل على هالرقم مره ثانيه ..
حمد : لـيش ؟
قلت له : لاني بنت محترمه وما اكلم ريال ما اعرفه ..
حمد : بس انتي تعرفيني ..
قلت : لا ما اعرفك ..
حمد : انا حمد اخو لطووف ..
قلت : ادري ..
حمد : كاهو تعرفيني..
قلت بملل : بس ما تصير لي شي ..
حمد : عادي .. يمكن مع الوقت اصيـر لج ., محد يدري ..
قلت : اووووووف وبعديــن معااك يعني والله ترى اعطي رقمك اخوووي ..
وانا في قلبي : والله اذا ابي الخلاص على روحي اعطي الرقم تركي ..
قال : اوكي خلاص المسامحه .. وانا ادري اصلا انتي ما ترضينها علي .. مهما كنت انا اخو لطوف حبيبه قلبج ..
قلت وانا ميته من الحره : اصلا لطوف ما تستحي ولا تخيل ماعطتك رقمي الخايسه .. انا ارويها
قال : لا هي مسكينه والله لو تدري ان عندي رقمج جان بتزعل .. انا اصلا خذته من جوالها ..
قلت له : يـــاااسلاااااام .. وليش تاخذه ..؟
قال : عجبني صووتج ..
قلت : لا والله .. في بنات وايد اصواتهم احلى من صوتي ..
قال : بس صوتج عجبني ..
قلت : ليش بالله مغنيه لك وانا مادري ؟
قال : عااد سويره لا تصيرين جاسيه علي .. كوني ريلاكس ..
قلت : اوووف انت ما بتفكني من شرك .. اصلا انا الغلطانه اللي راده عليـك ..
وسكرت ودخل علي تركي .. ومت من الروع .. اكيــد سمعني وانا اصارخ .. حسبي الله عليك يا حمد ..
تركي عاقد حواجبه : ليـش قاعده لهالحزه ..
يوم شفته مب معصب ارتحت ..
قلت : شتبي فيني انت بعد .. كيفي بنام متى ما انام ..
قرب مني ومسكني من ثيابي ووقفني : انتي بتتكلميــــــن عـدل والا شلووووون ؟
بصراحه صوته يسوي لي رعـب ..
قلت : شنو يعني انت ياي متسبب ..
قال : والله انتي المتسببه .. وقليله ادب بعد ..
تخصرت : يــــــه الحين انت العايل علي وتقول لي انا المتسببه ؟
مسكني من رقبتي : سااااااارووه بتحترمين نفسج والا شلوووون ؟
قلت : انت شفيـك جنيـــــت ؟ مااااالك خص فيني .. تفهم ماااااااالك خــص فيــــني ..
شليت يده من رقبتي ورحت اركض غرفه امي .. ما لقيتها وتوني بطلع لقيته جدامي ..وكنت اتنفس بصعوبه ..وما عرفت شاسوي من الخوف ..
يصارخ علي : انتي تعرفين تتكلمين عدل والا لا ؟
حطيت يدي على خصري : لا علـمني ..
وياني ذاك الكف اللي ما حسيت بروحي الا وانا على الارض طايحه .. ومن قوه الكف حسيت بونه في اذني .. وماكفاه هاي نزل مستواي وقال : المره اليايه يوم بتكلميني جي اعرفي ان مووتج على ايدي .. " وراح "
تميت اصيــح بصوووت عالي واسبـــه وانا اصاارخ.. وامي وخالي ياو .. وياني تركي يركض يبي يضربني بعد لاني سبيته .. وغطيت ويهي بيدي ابي احمي روحي .. وحسيت ان شعري كله طاح لان مسكني من شعري يبي يقومني ..

وانا اصارخ .. ويا خالي ودزه عني وامي ظمتني لصدرها .. وانا اشاهق ابي اقول لها السالفه .. بس ما كنت اقدر لان كنت اصيـح من قلب .. خالي اخذ تركي برع مادري وين وداه هالحقيــر.. وامي تمت معاي تواسيني .. وريم وخالد اخواني الصغار كانوا يطالعون المشهد وهم خااايفين وميمي فديتها مادري وينها.. اما غايوه مادري وين طاسه ..
امي تمسح على شعري : شقلتي له يمه ؟
وانا اصيح وبصوت مبحوح : والله ما قلت له شي .. هو اللي ياي غرفتي متسبب علي ..
وتميت اصيح .. وحسيت بالتعب ودتني امي غرفتي .. ونمت على طووول ..
فتحت عيوني على صوت رنه جوالي ..تننانا تننانا تننانا نا > رنه جوالي .. مسكت الجوال وشفت الساعه 11 الضحى يعني امي ما قعدتي حق الجامعه احسـن .. الحمدلله ان ما علينا امتحان .. جان رسبت ..
رديت بدون ما اطالع منو متصل وبكسل :الوووه ..
حمد : رقاااااااااد هااا .. ليش ما رحتي الجااامعه .. لطوف شكثر متصله لج ليش ما رحتي ؟
رديت : وانت شلك خـص ..
حمد : لا حبيت اتطمن عليـج.. شفيـج شكلج تعبانه ..
عاد انا ما صدقت حد يسأل عني .. جان اصيــح ..
حمد : ساااره .. سااره شفيـج .. انا أذيتج .. اذا تبيني اسكر بسكر بس لا تصيحين .. سارووه ردي علي شفيــج ..
قلت له وانا اشاهق : اخوووي ..
قالي بسرررعه : مــــــاااااااات؟؟
قلت له : ياااريــت .. اخوووي ظربني ظرب امـس ..
قال بخووف : ليـش .. ليكون عرف اني اكلمج ؟
قلت له : لا هو متسبب والله العظيـم متسبب ..
واشـك انه سمع كلمه عشان كنت اصيح وانا اتكلم ..
قال لي : انزين الحين سكتي عشان اقدر اسمعج .. انتي اهدي وقوليلي شصاار ؟
قلت له : انا ما سويت شي .. هو يا يابفيت يبي يعلمني الادب وانا ما احب حد يأمرني صرخت في ويهه وضربني ..
قال : يعل تنكسر اي يد تنمد عليج مره ثانيه ..
سكت وتميت امسح دموعي ..
قال لي : ترى مب كل الرجاجيل جي ..
مسكيــن خايف اني اتعقد ..
ضحكت : ههههههههههه ادري .. فيه الاخس ..
قال بصدق : لا والله انا مب جي .. سألي لطوف اذا انا مره مديت يدي عليها ..
قلت : انت اصلا مب داري عن لطوف وعن هوى دارها ..
قال : بس هي مب قاصرها شي ..
سمعت صوت طقه الباب ..
قلت له بسرعه : امي امي .. بااي ..
وكأنه كان بيقول كلام بس انا سكرت بسرعه لان امي دخلت ..

الجـــ الثاني ـــزء

يات امي وقعدت على حد السرير ومسحت على شعري : شلونج يمه الحين ..؟
سويت روحي زعلانه : مب بخيـر .. هذا ولدج اذا تم في البيت انا بطلع .. مب حاله هذي قاعده في بيت اهلي ومب ماخذه راحتي حتى في الكلام ..
امي : حبيبتي هذا اخووج ولازم تتحملينه ..
قلت لها : انزين جاان انتي تحملتي ابووي وما خليتيه يطلقج .. جان ما صار اللي صاار ..
امي تنهدت وحسيت اني جرحتها بالكلام .. وقالت : قومي نرتب البيت .. اخوانج اعفسو الدنيا امس .." وراحت "
قعدت اصارخ : بــس هذي حاالتنا .. ريموه وخلووووووود وميمي يعفسوووون البيت وانا ارتب وراهم .. حد قاااااال لهـم انـــــي خداااااااامتهــم ..
خذت نفس طويل .. لان رااسي حسيته بينفجر علي .. دخلت الحمام وتسبحت .. وشفت الكحل اغراني .. جان اشخطه في عيني .. ولبست جلابيه بنفسجيه ..وخذت لي شيله لان اعرف امي بتقول لي انشري الملابس فوق السطح .. واول ما وصلت الصاله لقيت ريموه مرتزه في الصاله .. حطيت يدي على خصري ..
وقلت لها : وانتــي حااظرتج ليــش ما رحتي المدرســـه ؟؟
ريموه : وانتي ليـش ما رحتــي الجااامعه ..
قلت : انا تعباانه ..
ريموه : وانا خلصت امتحااان ..
استغرب ورحت عند امي في المطبخ ..
وقلت لها : يمه صـج ريموه خلصت مدرسه ؟
قالت : ايه خلصت ,.. هي ابتدائيه غير عنكم ..
قلت : ياااااااااااحيييييييييييييها .. يمه ترى عندي امتحاان بكره هاا ..
امي شهقت : ليـكووووون كان عندج امتحان اليوم وضيعتيه ..
قلت لها : لا ما كان عندي .. حمدي ربج ..
قالت : انتي المفروض تحمدين ربج ان ما عنج امتحان اليوم ..
قلت لها : انتي اللي ما قعدتيني ..
قالت : والله قعدتج قعدتي تونين خليتج ورحت .. وبسج هذره خذي هالسله ووديها انشريها ..
قلت : يمه انا قلت لج عندي امتحان مب تكرفيني ..
قالت : وغايوه عندها امتحاان .. من بيساعدني ..
قلت : خلي خالد وريموه يساعدونج ..
قالت لي : صغاار ..
وخذت السله وانا انااافخ وركبت فوق السطح .. وكنت اشوف بيت لطوف يالله محلى هالبيت .. فله على كيف كيفكم .. واحنا بيت شعبي ولا يلوع الجبد .. خذت الثياب وقمت انشرهم وشفت حد مـر .. رفعت عيوني لقيت واحد يطالعني من دريشه بيت لطووف .. هااي اكيـد حمد اخووها .. عدلت شيلتي وكملت .. شفته فتح الدريشه .. عاد انا خفت .. وتم يطالعني .. خفت زياده .. سمعته يتكلم لكني ما كنت اسمع الكلام اللي يقوله واضح .. وشفته التفت ورى يعني داخل بيتهم .. كملت تعليق الملابس .. وشفت لطوف تأشر لي .. طالعته وصرخـت ..
قلت : لطوووووووووووووووف ..
لطوف تصارخ عشان اسمعها : ليــــش ما جيتي الجاامعه .. هااااااااااا ..
قلت لها : كنــــــت تعبــــــــاااااااانه ..
وعلى طول اختفت من عيني .. لان اخوها جرها وتم هو واقف عند الدريشه ..
طالعته وصديت كملت تعليق الملابس ..
سمعته يقول لي : واخـــــــــيررررررررراااااا شفتــــج ..
ابتسمت وسويت روحي ما اسمعه ولا منتبهه له ..
قال : سااااااااااااااااااروووووه .. تسمعيني ؟؟
التفت له وقربت عشان ما ابي اعلي صوتي وايد : شتــبي ؟
قال وهو مبتسم : انا حـمد .. عرفتيني ..
شفته نفس الوصف اللي وصفته لطوف لي .. والله تعرف توصف ..
قلت له : ايه عرفتك ..
قال لي : والله طلعتي حلووه .. ترى يبين من صوتج ..
قلت له وانا مستحيه : يالعيااااااار ..
سمعت امي تناديني تبي السـله ..
قلته له :ا مي تناديني الحين بنزل .. وخذت السله وشفت موجوده بيجامه غايوه فيها ما علقتها حذفتها على الدرام مال الماي .. وخذت السله وركضت تحت ..
امي : سـنه قاعده فووق ..
قلت لها :وانتي تحسبين ماعطتني السله فااضيه ..؟
قالت لي : خذيها وجمعي الثياب اللي في الحمامات خلني اغسلهم ..
تأففت كالعاده ورحت .. والحمدلله ما قيت ثياب وايد .. وعقب خليت ريموه ترتب الصاله وانا اشرف عليها ^.^ ..وعلى الساعه 1 ونص البيت نظف والاكل جهز .. وانا كنت ميته من الجووع .. عادي اكل اي حد يمر جدامي ..وحطو الغدى مجبوس لحـم .. يمي يمي .. وكلت لين ما حسيت انه بيطلع من خشمي .. وقمت على طووول رقدت .. لاني تعبت اليوم تعب مب طبيعي .. وقمت الساعه 4 ونص وخذت كتبي وقعدت ادرس لين الساعه 7 وطول الوقت كانت ميمي معاي تدور في الغرفه وعقب حسيت بتعب رحت الصاله وشفت خالي وسلمت عليه لاني ما شفته من امس وحتى على الغدى ما يا مدري ليش ؟ ..
قلت له : شلوونك مشاري .
حسيت استانس يوم قلت له مشاري : بخيــر دامج تقولين لي مشااري ..
ضحكت : ههههههههههه انت وايد تصغر عمرك ..
قال : والله ما اصغر عمرج جفتي واحد عمره 24 ويقولون له خاالي ..
قلت : ايه واايد ..
قال : بس انتي اصغر مني بـ 4 سنوات .. يعني مب وايد ..
قلت له : اوكي .. مشااري ..
ضحك ..
عقب يا تركي وكان يتكلم في التلفون .. وكان يكلم ماجد رفيجه وانا هالريال اكرهه مادري ليـش مع انه مدير تركي في الشغل .. وتركي كل مره يسولف عنه وعن اعماله وهو وايد مفتخر فيه مادري على شنوو .. على هالكم عماره اللي عنده . ما اقول الا الطيور على اشكالها تقـع .. وكم مره شافني .. مره كان تركي عازمه على العشا .. وانا كنت بعطي تركي العصيـر وماجد اللي فتح الباب .. ومن الربكه عطيته العصير شوي شوي ورحت .. بهدووء .. مادري ليش صدمتي كانت بالبطـيئ .. والمره الثانيه كنا طالعيـن مع تركي وهذا نادر طبعا.. وشفنا ماجد رفيجه وسلم عليه تركي وماجد يطالعني بنظرات .. ماادري شاسميها .. بس انا ما حبيتها .. المهم ..
ورحت اساعد امي في المطبخ لانها كنت تسوي العشا ..و كاان في سؤال يدوور في باللي من اياام .. وقلت بفاتحها بالمووضووع ..
قلت بصوت واطي : يــمه ..
امي مشغوله بحوس الجدر : هـمممم ..
قلت : يمه ابي اسألج ..
امي : شنو ؟
قلت : يمه بس ما ابيج تعصبيـــن ..
امي : قولي شنو خلصيني ؟
قلت وانا العب في اصابعي : ابي اعرف انتي وابووي ليـش انفصلتوا عن بعض ..
امي التفتت بسرعه كأنها ما كانت متوقعه سؤالي ..
قلت لها بسرعه : انا من حقي اعرف ..
خذتني وقعدتي على الكرسي نزلت راسها وتنهدت وبعد فتره قالت: كانت بينا خلافات وما قدرنا نستمر اكثر من جي ..
قلت لها : انزين ما قدرتو تستحملون هالخلافات عشان عيالج الصغار على الاقل ..
امي منزله راسها : ما كانت خلافات بس ..
قلت لها بسرعه : شنوو عيـل ..

امي : كان يشـك فيني .. لان اهلي كانوا محيريني حق ولد خالتي وما تزوجته لاني ما ابيه ولا هو يبيني واهلي تفهمو الموضوع ما جبرونا على بعض .. ويا ابوج وتقدم لي ووافقت .. ويوم درى اني كنت محيره حق ولد خالتي تم يراقب حركاتي .. وقام يمنعني من زياره خالتي الله يرحمها .. حتى العزى ما خلاني اروح الا يوم واحد واللي هو اخر يوم العزى .. وجابر اللي هو ولد خالتي واخته ميسون وايد كانوا زعلانين مني .. لاني انا قبل لا تزوج ابوج كنت كل مره ازورهم .. بس من تزوجت ابوج ما زرتهم الا كم مره وتنعد على اصابع اليد الوحده .. وانا وابوج كنا كل يوم نتهاوش على هالسالفه .. وعقب كم شهر من وفاه خالتي .. سمعته يكلم بنت على التلفون .. انا قلت يمكن عمتج نهله .. لكن لا .. عمتج وين فاضيه حق ابوج عشان تسولف معاه وتضحكه .. هي فاضيه بس تجابل شركاتها وحلالها اللي زوجها خلاها تلعب فيه لعبه بعد تعبه ..
قلت : ليش زوج عمتي تعبان ..
امي : ايه يمه تعبان لان هو فيه السكر.. وارتفع عليه فجأه وعمى .. يعني صار عمي ..
كسر خاطري زوج عمتي . بس ابي اسمع سالفه امي ..
قلت لها : المهم ..
امي : المهم .. صرت كل يوم اسمعه شنو يقول .. وشنو يوعدها فيه .. اثاريه يوعدها بالزواج .. ما قدرت اصبر اكثر من جي .. هو يشك فيني ويغار علي من واحد متزوج .. وانا ماعطته كل الثقه اخرتها يخووني .. " وشفت عيون امي تلمع " انا ما قصرت بحقه ولا بحق البيت ولا بحق عيالي عشان يخوني .. دخلت عليه الغرفه وهو من الربكه سكر في ويهها .. وتميت اهاوشه وتهاوشنا وطلبت منه الطلا ق .. وطلع من البيت وما رد الا بعد سبوع وورقه الطلاق في يده .. وانتو سألتوني وين ابوكم قلت لكم مسافر .. وبعد ما شفت ورقه الطلاق انهرت .. تحسفت على عمري اللي قضيته مع واحد خايـن وانااني ..
ونزلت دمعه منها وانا سبقتها بدمووع ..وتمينا نصيح وظميتها وعقب شوي هدينا وكل وحده تمسح دموعها وتضحك .. والله سالفتنا سالفه ..وعقب راحت امي بسرعه وشافت الجدر وتمت تحمس ومدري شتسوي .. فديـــتج يمه .. والله كنتي معانيه من صغرج من ابوي .. بس تصدقوون ابوي وحشني .. بس احنا وحشناه والا لا .؟. يعني معقوله تاركنا سنتين وما فكر يسأل عنا .. احنا عايشين والا ميتين .. محتاجين شي والا لا ..؟ تنهدت ورحت الصاله وشفت تركي مرتز في الصاله يطالع المباراه كانت ما بين الريان والسد .. وخالي كان معاه ولابس بنطلون اسود وتيشيرت احمر.. عشان يثبت لنا انه رياني ( لان لون الريان اسود واحمر ) ورحت اركض غرفتي وتميت ادور شي اسود وابيض لون نادي السـد فديته .. ولقيت بنطلون اسـود ودورت بدي ابيض ولقيت ورفعت شعري وربطت الشيله على راسي اوني رياضيه .. ورحت اركــض وقعدت احذى مشاري ولا معبره تركي الزفت ..
مشاري : يالتقلــيد ..
قلت له : والله ما قلدتك انا لابسه ابيض واسود .. " تميت اطالعه من فوق لتحت " مب اسود واحمر ..
قال لي : شقــصدج ..
تركي : يـــااخي سكتو نبي نشووف المباراه ..
قلت له بصوت واطي : شوف حد مغطي عيونك ..
مشاري مسك يدي عشان اسكت وتركي طالعني بسرعه .. بصرااحه خفت .. ومشاري يبي يكسر هالجو ..
مشاري : اذا فاااز الريااان ابيج تهمزيني لين ما ارقد .. واذا فاز السـد شتبين اسوي لج ؟
قلت له : امممممممم .. " وكلمته في اذنه " ابيك توديني المسيـره ..
مشاري : حااظرين .. مع ان بيكون قهر لي بس شاسوي .. حكم القوي على الضعيـف ..
وتمينا نطالع المباراه .. والريان جاب هدف وانا انقهرت .. وتميت اتابع انا ومشاري وتركي .. وفي الوقت الضايع السـد جاب هدف .. وسويت حفله في البيت .. قمت اناقز ورايحه ويايه ما اعرف شاسوي .. ووعقب خلص وقت المباراه وجا الوقت الاضافي .. وفي الوقت الاضافي الـسد جابوا هدف وجااااااان اطــير من الونااسه .. واقعد اناقز في البيت ودخلت على غايوه في الميلس وخربت عليها دراستها ..
قلت لها وانا انااقز : غاااااااااااايوووووه الـــسد فاااااااااز ..
غايوه ابتسمت : مبرووك ..
همست : قوومي لبسي عشان مشاري قال بيودينا المسيــره اذا فااز السـد ..
غايوه انقزت .. ورحنا لبسنا ولبست خلود بعد .. وخليت ريموه عند امي لان اذا عرفت احنا وين رايحين بتفضحنا عند تركي .. وتركي اذا عرف ان احنا رايحين المسيره عادي ينحرنا كلنا .. ورحنا انا وغايوه نركض سياره مشاري خالي .. واللي يوقفنا صوت تركي ..
تركي بصوت عالي : عـــــــلى ويـــــــــن ؟؟؟
التفت عليه بسرعه : مشاري بيطلعنا ..
تركي : اصغر عيالج تقولين له مشاري ..؟
قلت : والله هو الي قالي .. وانت لا تتدخل بشي ما يخصك ..
تجدم مني : ساااروه والله العظيــم اذا ما تســ
وقاطعه مشاري من وراه : انا بوديهم مكان ..
تركي التفت له : ويـن .؟
مشاري : مكــان .. مب لازم تعرف .. اذا انت تشجع العربي تم شجعه ..
وراح عنه واحنا لحقناه ..وخالد ياي يركض ورانا ورابط علم السد ورى ظهره.. فديته سداوي.. وركبنا كلنا سياره مشاري وانا طبعا جدام .. ايه انا العوده .. جان فيهم خير يبطلون حجلهم بكلمه .. وراح مشاري صوب المسيره مادري وين تقع .. ترى انا ما ادل ولا شي في قطر ولا غير قطر .. لان مب من كثر طلعاتي من البيت .. من الجامعه للبيت ومن البيت للجامعه ..واذا غيرت خلاص يعني بروح بروح مكان راقي . اروح بيت خالتي زينب ..المهم .. خلود وغايوه بطلو الدريشه وانا بطلت بعد .. خلود طلع علم السد برع ويلعب فيه وخالي يظرب اشارات وهرانه .. مسكين كسر خاطر .. هو رياني وخليناه يودينا المسيره .. هع .. وانا طلعت راسي مستانسه على الجو الحار .. وقعد اغني معاهم .. لانهم حاطين اغنيه حق السد طبعا مب في سياره خالي في سياره ثانيه ومعلين عليه وانا اقول : ايــوه ايووووه .. وخالد اخوي معااي .. وغايه تصفق ومستانسين .. والله لو كان تركي بدال خالي .. جان كان اليوم عزانا ..بيذبحنا كلنا وبيفتك من فضيحتنا .. بس خالي فديته طيوب ومايقول شي .. وشرينا لنا عصاير من السوبر ماركت ورجعنا البيت ومحد بيقول حق تركي وين رحنا طبعا .. واول ما دخلنا البيت تركي كان يستقبلنا ..
تركي : وين كنتوا ..
قلت له : والله كنا مع خالي مب مع حد غريـب ..
تركي : انتي انطمي ولساني ما ابيه يطب بالسانج ..
قلت له وانا رايحه : يكوون احسن ..
فصخت عباتي في غرفته وركضت المطبخ وفي يدي كيس العصاير .. وانا ميته من الجوع ..حطيت العصاير في الثلاجه ورحت اشوف امي شمسويه لنا .. يااااي صنيه البطاطا بالفرن .. شنو احب هالاكلــه .. يمي يمي .. قعدت ادور امي . لقيتها في الصاله تتكلم في التفلون ..
قلت : يــماا يووعانه .. خلنا نحـط العــشا ,,
امي : روحي حطيه انا الحين يايتج ..
ورحت المطبخ وشفت غايوه تدور ..
سويت عمري بخرعها جيت من وراها : بووووووووووووه ..
غايوه التفت ولا كأن حنجرتي كانت بتطيح وانا اصارخ عليها ..
دزيتها : مالت عليج سوي عمرج تخرعتي عشان حنجرتي ..
غايوه : والله انج متفيجه ..
قلت لها : شنو تركي هاوشج .؟
غايه : هذا اذا ما نطق يوم واحد وهاوشنا ما يكون تركي ولد امي وابوي ..
قلت لها : عاادي تهاوشي معاه .. ويقول لج لا يطب لساني بالسانج نفس ما قال لي وبتفتكيـن من شره ..
غايوه : بعد شنو افتكيتي من شره انتي .. بعد ما ظربج وطيحج ..
قلت لها : لازم حبيبتي تنظربين وتاكلين تبن عشان تفتكيـن منه ..
غايوه : وانتي شظمنج انج افتكيتي منه .. بكره بيقوم وبيتسبب عليج وبيكفخج ..
قلت : خــسي الا هوو ..
وامي دخلت : ما حطيتي العشا .. توج ميته من الجووع ..
قلت : غايوه ما خلتني ...
غايوه شهقت : انا يالعاياااره ..
امي : بس بس سكتوا.. ثنينكم ما في اعير منكم ..
جهزنا انا وغايوه سفرة الاكل وحطينا الصحون والملاعق وامي جابت الصينيه وحطتها في وسط السفره ؟؟ وقعدت اكل بشراهه ماعلي من تركي اما غايوه تاكل وعيونها على تركي خايفه يطلع اللقمه من حلجها .. وخلصت شبعت ورحت غرفتي ابي اناام ..شفت تلفوني يرن .. نطيت على السرير واخذت الجوال ورديت وما شفت من..
: الوووووووووو ..
حمد: هــلا والله بهالصوت .
استانست يوم كلمني واسوي روحي ما عرفته : مـن حمــد ؟
حمد : ايـه حمد .. شلونج ؟
قلت له : بـخيـر .. وانت شلونك وشلون لطوف .؟
حمد : كلنا بخـير وودنا نشوفج ..
قلت : لطوف شبعت منـي ..
حمد : بس انا ما شفتج الا مره وابي اشوفـج ..
قلت : لـيش .. مب كفايه مـره ..
حمد : لو وحده تلوع الجبد امثال لطوف جان بقول مره تكفي .. بس اللي يشوفج وين تكفيه نظره .. ومن بعـــــــــــيد بعد ..
قلت : بكره ان شالله ..
حمد بلهفه : مـــتــى ؟
قلت : مادري .. انا يوم اعلق الملابس محد يكون مووجوود عندي فوق ..
حمد : بـس ما اشوفج عدل .. من بعيـد ..
قلت : بعد هذا اللي اقدر عليه ..
حمد : بكره عندج امتحان صـح ..
قلت : ايه ..
حمد : بعد الامتحان باخذج انتي ولطوف وبنروح مطعم نتريق ..
خفت وقلت : لا لا لا لا لا لا لا لا لا لا لا لا لا ..
حمد : بل بل بل لــيــــــــــــــــش عاااااااااد ..؟
قلت : واذا حد شافني ..؟
حمد : من بيشوووووفج .؟ مب اخوج يكون في الشغل ؟
قلت : ايه ..
حمد :وخالج بعد صـح ؟
قلت : ايه ..
حمد : عيل من شنوو خايفه .؟
قلت : اوكي خلاص .. متـى قلت ..
حمد : بعد ما تخلصون امتحانكم ..
قلت في قلبي : زين قلت عشان اكشخ شويه .. ^.^
حمد : هاا شقلتي ؟
قلت : اوووكي ..
حمد : ما ابيج تكشخيـن .. بعدين ينعجبون فيج ..
ضحكت : هههههههههههه شدعوه ..
حمد : ايه بعد انا ابيج لي بروحي ..
انحرجت .. وتمينا نسولف حوالي نص ساعه .. وسكرنا من بعض وانا كنت ميته من النوده ابي اناااااااام .. وماصدقت سكرت التلفون والتفت على سرير غايوه مالقيتها .. يحليها تدرس .. وتوني بغمض عيوني عشان اروح بسابع نومه والا ميمي تفدع الباب .. قمت بسرعه ..
ميمي : لا لا ابي انام اندش >> طبعا مافهمتو .. قول : ساره ابي انام عندج ..
فتحت لها يدي ويات تركض وضميتها ونمت على طوول ..
ووعيت على ظربات في بطني .. فتحت عيوني الا ميمي فديتها ترفسني .. شفت الساعه 4 الفجر .. استغربت ان امي ما قعدتني حق الصلاه .. قمت صليـت ورديت نمت .. ووعيت على صوت امي تقعدني ..
قلت التفت على سرير غايوه شفتها محد : قمــت يمه خلاص ..
امي : قومي يلا اليوم امتحااانج ..
شهقت . يعني اليــوم بقابل حمــــد .. قمت بسرعه وغسلت ويهي ولبست تنوره فوشيه وبدي زيتي نـك .. ورفعت شعري كله بعضاضه ( كليب , توكه ) ونزلو خصل حلوه ونزلت غرتي اللي كنت قاصتها من سبوع .. وحطيت ميك اب خفيف .. بودره وظـل وردي خفيف وكحل بطريقتي وطلعت من غرفتي ماسكه عباتي وكتبي وشنطتي الورديه ..
امي : تعالي تريقي ..
قلت في خاطري : انا معزوومه على ريوق تبيني اتريق ريوق البيت .. بلاليط ..؟
قلت : لا يمه مستعيله .. بروح الجامعه .. وين تركي ؟
امي : تركي راح ..
تصرت : لاااااا والله .. ومن بيوصلني ؟؟
امي : خالج بيطلع من الحمام الحين وروحي معاه ..
قلت : يمه انا مستعيــــــــــــله ..
امي : بعد شاسوي فيـج .. انتظري مشاري لين ما يطلع من الحمام وروحي معاه ..
دقيت الباب على مشاري ..
قلت : ميـــــــــــشووووووووو يلا انا بتأخر ..
مشاري : زين بطلع ..
وطلع وكان لابس الحمدلله ووداني الجامعه وشفت لطوف توها نازله من السياره .. ودخلنا الجامعه مع بعض ..
قلت لها : لطووووووووف انا خاااااااايفه ..
لطوف : من شنوو ؟
قلت لها : ما درست للامتحان عدل .. والله اخاف يعطوني طرد ..
لطوف : درجاتج القبليه اوكي .. يعني مب طاردينج .. قومي يلا ..
ورحنا قدمنا امتحان وكان سهل شوي .. رفعت جوالي ابي اتصل بتركي او مشاري يجوني ..
لطوف : حق منـو متصله ؟؟
قلت : حق تركي والا مشاري ..
لطوف : ليــــــــــــــــــــــش ؟؟
تخرعت : ليش ما اتصل خلصت .. واليوم ماعندي محاظرات ..
لطوف : انتي نسيتي ان اليوم بنروح المطعم مع حمد..
تذكرت : ايـــــــه صج ..
لطوف تغمز لي : يقوول انج حـلوه .. شعندها ..
انحرجت : ما عنده سالفه اخووج ..

لطوف : لا والله من صجه ..
قلت : انزين متى بيجي الشمس بطت راسي..
لطوف رفعت جوالها عشان تتصل بحمد اخوها ..
لطوف : هلا حمد .. ايه خلصنا .. ايه ايه معاااي .. هههههههههههههههههههههه ان شالله عمي .. يلا باي باي .. اوووووووه سخيف .." وسكرت في ويهه "
لطوف : الحين ياي ..
قعدنا في الكفتيريا لين ما يجي حمد .. عدلت كحلي وظبطت مكايجي وحطيت لي قلوس وردي .. وعدلت شيلتي ..
لطوف ماسكه التلفون : يلا ساروه حمد عند الباب ..
شقيت حلجي مع اني احس ان الجامعه كلها يسمعون دقات قلبي .. طلعت من باب الجامعه وشفت واحد راكب سياره مرسيدس سوده وطالع من الغتره شعره الكستنائي .. وعرفت على طووول ان هاي حمد .. لطوف ركبت اول ... وتاشر لي اني ايي .. كانت بتنزل من السياره والتفتت على حمد شكله يقول لها شي .. نزل احمد شهقت . وانا بصراحه مادري ليش انا للحين واقفه مب قادره ادخل ..
حمد قرب صوبي وتم يطالعني .. انا انحرجت ونزلت راسي ..
حمد : شلوونج ساره ؟
همست : بخــير .. وانت شحالك ؟
حمد : طيب من شوفتج ..
سمعت لطوف تصارخ مادري شتقوول ..
حمد : يلا ركبي لا تستنزل علينا هذي ..
كتمت الضحكه ركبت ورى لطوف . وطول الطريـج اسمع سوالف حمد ولطوف وهواشهم .. واقعد اضحك ..
حمد : ساره ليـش سااكته ؟
قلت : اسمع سوالفكم ..
حمد : خلاص بنسكت وبنسمعج شتقولين ..
لطوف : شفيج ساروه حاطينج على الصامت . خخخخخخخخخخخ
قلت لها بعفويه : لا على الهزاز ..
ما وعيت الا .
حمد : هههههههههههههههههههههههههههههههههههههههههههههههههه ههههههههههه ..
لطوف : اعجبتك ؟؟
حمد : ههههههههههههههههههههه واايد ..
وطول الطريج سوالف وضحك وانا كنت شوي اسولف مب وايد .. مستحيه من حمد ..
ووصلنا فندق .. شهقت داخلياً .. معقوووله بنتريق هنيـــه ..؟
وقف حمد سيارته ..
حمد : يلا نزلوو ..
نزلنا انا ولطوف وتميت ماسكتها من يدها ..
لطوف : شفيــج ..؟ ترى حمد ماياكل ..
قلت : والله انا مب خايفه منه .. خايفه اضيــع ..
لطوف : هههههههههههههههههههه شنو اللي بيضيعج ..
قلت : سكتي سكتي ..
وقعدنا على طاوله .. بصراحه او ل مره في حيااتي ادخل معطم جــي .. فخم .. يااااي .. ونااسه .. انا انسدت نفسي عن الاكل .. بس ابي اقعد واطالع هالفخامه ..
حمد يأشر بيده : ساااااااااره .. وين رحتي ؟؟
انتبهت له : ولا مكان .. معاكم ..
حمد : عجبج المكااان ..؟
قلت له : وااااااااايد ..
حمد : كل يوم بجيبج هني .. انتي ولطووف ..
استانست : لا مب كل مره .. انا اصلا مادري شلون رضيت ..
حمد : افاا .. يعني انا لو بقول لج شي او بطلب منج طلب بترفضينه لــي ؟؟
قلت: على حسب الطلب ..
حمد : اهااا ..
لطوف : يلا أكلنا ..بعد جايبنا هنيه عشان تذلنا .. ابي اكل انا ..
حمد : زين زين .. كلتنيني .. اعنبووووووووه ..
ونادى واحد من اللي واقفين فوق راسنا .. وتم يتكلم معاه بالانجليزي .. وانا بصرااحه مافهمت الا شوووي .. انا اعرف انجليزي بس مب وايد .. >> ثقافتها فرنسيه ..هع
وتمينا ناكل وحمد يقط نغزات وانا اسوي روحي مب فاهمه شي .. وشفت حمد ماسك جواله ومادري شيسوي .. وعقب رن جوال لطوف .. وكأنه مسـج .. قرته وتمت تضـك .. ظحكت على ظحكتها وسكت .. شفت لطوف قامت ..
قلت لها : ويـن ؟
لطوف : في شي بروح اتأكد منه ..
قمت : بروح معاج ..
لطوف تطالع حمد : لا انتي قعدي .. دقاايق وبجي ..
وراحت بسرعه .. شالساااااااااالفه ..
حمد : ماتبين تقعدين معااااااي ؟؟
طالعته : عادي بس ليـش راحت لطوف .. وين راحت .؟
حمد : ماعليج منها .. بس انا في بالي سؤال .. ليش انتي تتصنعين الهدوء .. في التلفون حاشرتني هواش وسب .. وهنيه عاد انج ساكته وتستحيــن ؟؟
بصراحه احرجني كلامه : الكلام مباشره يختلف عن الكلام في التلفون ..
حمد : اي احلى ..؟
قلت : لا على التلفون اخذ راحتي اكثـر ..
حمد : ليـش شكلي ما اعجبج ..؟
قلت بعفويه : لا والله حلــو .. بس استحي شوي ..
حمد : صـــــج انا حلــو ؟؟
قلت : ليش شااك ؟
حمد : انــــــاااااا اقوووووووووول كل ما ارووح مركز من هالمراكز يتلايموون علي البناااااات ..
تخصرت : لااااااااا واللـــــه ..
حمد : ههههههههههههه شفيج تغااريـن ..
انتبهت على نفسي : لا ما اغار .. بس يبين من كلامك انك كذااااب ..
حمد : انا ما اكذب ..
قلت : امـبـلا .. والا البنات ما يتلايمون على شبااب ..
حمد : امــبلا .. انا اكوني جدامج .. يتلايمون علي البنات
قلت : بس ترى المطعم بينفجر ..
حمد مستغرب : ليـــــــش ؟؟
قلت : من الصواريخ اللي تطلعها ..
حمد : ههههههههههههههههههههههههه .. صج عاد ..
يرن جوال حمد ..
احمد : شتبيــن..
استغربت.. يكلم بنت وجدااامي بعد .. شوفو الوقااحه ..
احمد يكمل : ليش تين .. خلج شوي .. ههههههههههههههههههه زين تعالي يلاا .. جب جب تعالي وانتي سااكته ..
قلت له بفضووووووووووول : منــــوو ؟؟
حمد : وحده ..
احتريت مادري ليـش .. وتميت ساكته الا لطوف يايه ...
لطوف : شقلـــــــــــــــــــــــــتووووووووووووووو ؟؟
ضحكت : ههههههههههههههه ماقلنا شي .. يلا ترى تأخرت .. بيحشرني تركي ..
حمد : يلا بوصلج ..
قلت : اووكي يلا ..
وركبنا السياره وحط حمد اغنيه محمد عبدوه " اخر طموحاتي " وتميت اسمع والكل سااكت .. ووصلني حمد البيت ..
وانا افتح باب السياره : مشكووريـن على التوصيله والعزيمه ..
حمد : حااظريــن ..
وسكرت الباب وهم دخلوا فلتهم .. دخلت وشفت الساعه كانت 11 ونص .. واتصلت حق تركي بسرعه ..رد علي على طول ..
تركي : ويــــــــنج صار لي ساعه الا ربع متنقع عند الباب واتصل لج مغلق .. وينــــــج هاااااااا ؟؟
خفت : انا في البيت ..
تركي : شنـــــــــــــــــــــووو ؟؟ في البيت منو موصلج ..
ارتبك وماعرفت شاسوي ..
تركي وشكله الشرار يطلع من عبونه : انـــا ياااااااي الحيـــــــن ...
خفت دخلت الصاله وشفت امي وميمي وريموه قاعدين .. سلمت على امي ورحت غرفتي وبدلت ورجعت الصاله ..
امي : وين تركي اخوج ؟
قلت لها : الحين بيجي ..
امي : ليـش وين راح .؟
قلت : مب هو اللي وصلني ..
امي مستغربه :عيـــل منووو ..
قلت : لطووف ..
انفتح الباب بقوه وحسيت ان البيت تزلزل .. بلعت ريجي .. وعلى طووول يا صوبي ..
تركي معصب : مـــــــــنوو موصلــــج ؟؟
قلت له : انت ليـش معصب الحين ..؟ خلاص اللي صار صار .. لا تعصـب ..
تركي يمسكني من ثيابي ويقومني : مــــــــــن اللي موصلج ..؟؟
قلت له : لطوووووووف .. لطووف موصلتني ... هدنـــي ,..
تركي يرص على اسنانه : ولطووووووووف من وموصلهاااااا ..؟؟
قلت له : اخوووها يعني منووووووو ؟؟
مد يده وعطااني كــف طيحني على الكرسي .. وتميت ماسكه مكان الكف واصيـح .. وامي يات على طول ووقفت في الوسط : بســك يا تركي خلاااص ..
تركي مب معبر كلام امي .. وراح من وراها وسحبني وانا امسك جلابيه امي وكأني اترجاها تتصرف او تسوي شي .. لان شكلي بمووت على يده اليوم ..
تركي يصطرني كففه على ويهي وانا احط يدي واصااارخ وابي اشرد منه لكنه ماسكني عدل .. وكنت انتظر خالي يجي من دوامه يتصرف معاه . لكن خالي يرجع الساعه 2 .. تميت اصيـح واصااارخ .. وانا اشوف وجوه ميمي وريموه شلون كانو يطالعون المشهد.. وامي تمسكه وهو يدزها بعيد عنا .. ومن بعدها ماحسيت بالدنيا .. واسمع صراخ امي وتركي ومادري شكانوا يقولون ..واسمع امي تقوول ماااتت اختك ماتت ..
كنت احس بيد ماسكه يدي .. واحاول افتح عيوني لكن احسها ثقيله .. وجسمي احسه مكسر .. وفتحت عين وحده بس والثانيه كانت تعورنــي مقدرت افتحها.. وشفت امي جنبي ماسكه يدي وخالي واقف فوق راسي وخالد وريم وميمي مصطفين قاعدين على كرسي واحد ..وغايوه قاعده تصيـح ..
امي نقزت صوبي : شلوونج يمه ..؟ ان شالله الحين احسن ..
شفت الخوف بعيونهم لكني ما قدرت اتكلم .. حسيت ان صوتي راح من كثر الصراخ .. وتلفت يمين ويسار وعرفت اني في المستشفى ..
يات الممرضه وتطمنت علي ويا الدكتور ..
الدكتور: شلونك ساره .. ان شالله دحيـن احسن ..؟
قلت له بتعب وبصوت مبحوح : مادري .
كشف علي الدكتور وطلع ..
مشاري مسك يدي : شنو يعورج ؟
صحت : شفت تركي شسوى فيني ..
مشاري : لا تصيحين حبيبتي .. لاتصيحين ..
حاولت اسكت لكن ازيد من صياحي .. لان حسيت اني بموت من الم ويهي وجسمي .. ونادولي الممرضه ويات عطتني ابره ونمت على طوول .. وعيت على الساعه 2 الفجـر .. تلفت يمين ويسار شفت خالي مشااري بس موجود ويطالع التلفزيون ..
همست : خالي .؟
خالي التفت بسرعه : سـاره ..
قلت له بتعب : ابي مااي ..
خالي نادى الممرضه عشان تعطيني ماي .. وعطتني بس شوي ..
خالي مشاري : شلوونج الحيــن .
ابتسمت : بخيـر ..
خالي : خوفتي امج عليج .. واليهال يصيحون .. يحسبونج متي ..
قلت : لو اموت احسن من هالعيشه ..
خالي : سوير لا تقولين جي مره ثانيه .. والله ثم والله ازعل عليـج ..
قلت : والله يا خالي انت اللي مصبرني على هالعيشه .. تركي يضربني من صوب وانت تهديني من صوب .. ليـش هو يكرهني ؟؟ انا شسويت فيه .. " وابتديت اصيـح "
خالي قرب مني : لا لا ساروه انا ما ابيج تصيحين .. وتركي غلطان وهو شكله ندمان على اللي سواه فيـج ..
اصيح : خالي هاي مب اول مره يضربني .. كسرني والله كسرني .. لين متى عاد بتم جي ليــن متــى ؟؟
خالي يحاول يهديني : انتي اهدي وانا بكلمه وبقول له ما يمد يده عليـج .. ترى انا هاوشته.. وقلت له ماله خـص فيج دامني حي .. انا اللي بأدبج ..
قلت : بس انا ما سويت شي غلـط ..
خالي : بس طلعتج مع حمد غلط ..
قلت بسرعه : ما كنا برووحنا .. كانت لطوف معاي ..
خالي : بس لازم كنتي تقولين حق تركي والا حق امج والا لي .. مايصير تروحين سكاتي ..
فكذبت عليه : كان تلفوني مفضي واخذت بطاريه لطوف عشان اكلم تركي ..
خالي : انزين حبيبتي خلاص لا تتعبين روحج .. ان شالله تركي مابيمد يده عليـج ..
انتهزت الفرصه : قووووووله ماله شغل فيني ..
خالي : ان شالله ..اي اوامر ثانيه انسه ساره ..؟
ابتسمت : مشكوور ..
خالي: ايه جي ابتسمي ..
طلع جواله : سمعي هالنكته : سأل مدرس طالب .. ماذا تعني لك الوطن .. قال له امي .. سأل رفيجه الثاني .. ماذا تعني لك الوطن .. قال له .. ام صديقي .. ههههههههه
ضحكت : هههههههههههههههه سخيف ..
خالي : انا ..
ضحكت : ههههههههههههه لا اللي مألفها ..
خالي : هههههههههههههههه ايه تصدقين .. عيل سمعي الثانيه .. غبي يقلب في الثلـج ..
قلت له : ليــش ؟؟

قال : ههههه يدور وحده حاره .. ههههههههههههه
ضحكت : هههههههههههههههه صج غبــي ..
وتميت طول الوقت اسمع نكت من عند خالي .. ويوم خلصو من جواله قام يألف نكت وبقول مواقف تضحك صارت له .. وانا بس اضحك .. فديــــــته خالي والله اني ماراح القى واحد مثله يهتم فيني واهمه ..

هالمره بحط لكم مقاطع من الجزء ..
قلت : شنــــووو ؟؟ من نص ساعه مكلمني ..
طرت من الوناااسه : احــــــــــــبك خااااااااااالي
لطوف : عادي توصليني ساروه .
امي : يبي يساافر
انصدمت : نعععععععععععععععممممم ..؟؟ لا ما ابيه ..
قلت له وانا ماسكه الصيحه : انت لا تشووف ابوي مطلق امــي وقلت بتتصرف فيني على كيــفك .. لا حبــيبي .. انا برووح عند ابووي وبقول له كل اللي صاار ..
قلت له : قلت له اني بقوول حق ابووي .. بس شكله ابووي ماراح يسوي شي .. حمد انا تعباانه .. تعبت خلاااااص من تسلط تركي علي .. كفايه يتحكم في طلعاتي .. بعد يتحكم في شريك حيااتي .. هنيه وبس ..
لطوف : ايه قال لي .. ولا يهمج ساروه ان شالله تركي يلين راسه ..


الجــــــ الثالث ـــــزء

بعد يومين طلعت من المستشفـى .. واخذت معاي عذر طبي عشان اقدم الامتحان الي فاتني .. ولطوف يحليلها اتصلت علي وأسألتني ليش ما جيت .. جان اخر لها السافه كلها .. وتمت تتحلطم على تركي .. رديت من المستشفى وكانت الساعه 4العصر .. دخلت الصاله وشفت تركي قاعد في الصاله وامي وغايوه معاه .. امي وغايوه يوم شافوني يايه مع خالي وقفوا وسلموا علي .. استااانست .. اول مره احس اني مهمه .. ولا عبرت تركي رحت غرفتي ارتحت شوي وهذا طلب امي .. وبدلت ملابسي وتسبحت وطلعت ودرست شوي لان بكره بقدم الامتحان اللي فاتني .. وتميت ادرس لين الساعه 8 .. غايوه دخلت علي ..
ابتسمت لها ويات قعدت جنبي : شلوونج .؟
ابتسمت : بخيـر .. شسويتو بدووني .؟
رفعت جتوفها مب مهتمه : ولاشي .. ملل وجو البيت متكهرب وامي ماتكلم تركي وتركي يحط الحره في اليهال .. وانا دايما اخليهم في غرفتنا عشان مايلحقونج .. هههههههههههه
ضحكت : زين سويتي .. هذا ثور مايحسب حساب حق حد .. المعفن ..
وتمينا نسولف لين موعد العشا .. تعشينا وكان تركي محد .. ترى تركي نااادر ياكل معانا . كله برع .. و24 ساعه التلفون في يده ..
قلت : يـــمه ..
امي : نعم ..؟
قلت : يمه ابي تلفوون ثاني .. هذا كله يسكر في ويه اللي اكلمهم .. وكل 10 دقايق يبي جرج .. يمه هذا الجوال من يكون عنده في الوقت .. تراه منقرض .. حتى المتحف مابياخذونه ..
خالي : ههههههههههههههههههههههه ولا يهمج انا باخذ لج جوال وبحول كرتج فاتوره .. بلا رصيد بلا كرووت ..
استاااااااااانست : مشــــكوووووووووور يا احلى خال في الدنيا ..
خالي يطالع ويهه في المنظره الصغيره اللي في الصاله : والله ابيــض ..
فطست عليه من الضحـك : ادري ..
شفت غايوه نقزت راحت صوب التلفزيون .. اثااااري حاطين اغنيه اليسا " كرمالك " وهي تموووت عليها ..
و تعشىينا وانا مع الايام نفسيتي كل يوم تتحسن .. قدمت غايوه امتحاناتها ونجحت وافتكت من الثانويه ومن المدرسه بكبرها .. اوانا بكره اخر امتحان عندي وعلاقتي بحمد كل يوم تزيد عن اللي قبله .. وما يصير شي في يومياتي الا وخارته له وهو نفس الشي .. ولطوف هي الوحيـده اللي تدري .. طبعا هي مرسال اللي بينا .. وحسيت اني ما اقدر ابعد عن حمد .. ما ادري هو حب والا شنو .. بس ما اقدر يوم ما اكلمه .. صار شي مهم في حيااتي ..
التفت بسرعه لان جوالي رن ..
رديت : هلا بهالصوووت ..
حمد : للحين ما سمعتي صووتي .. هههههههههههههههه
ضحكت : هههههههههههههه بس عارفه ..
حمد : هلا حبي .. شلوونج ..؟ من زمااان ما لكمتــج ..!!
قلت : شنــــووو ؟؟ من نص ساعه مكلمني ..
حمد : اشتقت لج ..
قلت بدلع : عن المصاخه .. يلا سكر ابي ادرس ..
حمد : اووكي حبي .. درسي عدل وبكره طوووووول اليوم بكلمج .. ماعندج عذر .. دراسه وبتكونين مخلصه ..
ابتسمت : اووكي ..
حمد : مع السلامه ..
رديت : في امان الله ..
واول ما سكرت انفتح الباب ..
دخل خالي وحاط يده ورى ظهره وكأنه خاش شي : شلووووون الحلوه الامووره ..؟
وانا اخذ كتابي من على الكمودينو : زينه .. انت وين طول اليوم مب مبين ..
قعد على سرير غايوه : انا كنت في الشغل رديت البيت ونمت وقمت ورديت طلعت وجيت الحين ..
ابتسمت : شنو اللي خاشه ورى ظهرك ..
خالي يطلعه : ترررااااااررررااااااا ..
شهقت : جوااااااااااااااااااااااااااااااااااااال يدييييييييييييييييييييييد ..

وخذته على طووول وفتحته .. وكان نوعه N72 وبست خالي على خده : مشكووووووووووور يا احلى مشااري في الدنياا ..
خالي : العفوو حبيبتي .. وبعد غيرت خطج من رصيد الى فاتوره ..
طرت من الوناااسه : احــــــــــــبك خااااااااااالي ..
خالي ابتسم وقعد يعلمني على الجوال وانا شاقه الحلج .. وعقب غايوه نادتنا على العشا ورحنا تعشينا .. وطبعا تركي مب موجوود .. وعقب كنت بنام بس امي قالت لي اروح اسقى الزرع .. انطـــبت جبدي .. رحت برع وانا اتحلطم .. وشفت تركي عند باب الحوش وماسك جواله ومبتسم ويتكلم .. وكاااااان خااطري اسمعه شنو يقوول .. قربت منه وكنت ورى شجره وهو جدامها .. يعني ما ابين واضـح ..
تركي : ايه حبيبتي .. ترى ما اقدر اتم عندج اكثـر من جـي .. اهلي بيشكوون ..
وانا في قلبـي : شنشك فيه ..؟ تــــــركي .. ما توقعته . الاخ النصوح اللي مايرضى بالغلط .. يكلم بنت ولا يروح لها بعد ..
تركي : لا والله اني احبــج شعوول لا تقووليــن جي .. هااا .. ههههههههههههههههههههههه لا والله انا عند باب بيتنا .. ليـش ؟؟ .. اييـج الحيـن ..؟ لا ما اقدر وصلت البيت وبيني وبينج تعبان ابي انام .. لا ما اقدر انام عندج اليوم .. شوفي حبيبتي .. بقول لهم اني مسافر يومين او سبوع وبيي بقعد عندج .. شراااااايج ..فديــتج والله .. لا مب هالايام .. الحيـن ما اقدر ..عندي ظروف شوي .. ايه هي مهلكتني.. الله يسلمج ..اوكي حبي ترى انا من مساعه عند الباب اكلمج .. ما اقدر لا ادخل ولا اطلـع .. ههههههههههههههه شلون ارجع لج بعد .. شوفي مشاعل ماما .. انا بدخل البيت الحين وبنام وبكره اول ما اقووم بكلمج .. اوكي حبي ..؟ مع السـلامه ..
وسكره وانا فاتحه حلجي على وسعه من الصــدمه .. معقوووووووووووووووووله .. تركي يحب وحده ويروح لها ويتقابلون .. ولااااااااا بعد بيروح يبات عندها .. ياللـــــــــــه شوفو الدنيا .. دخلت داخل البيت وافكار توديني وافكار تجيبني .. ورحت غرفتي وانا سرحانه ..
غايوه : ربعــي كلهم مسجليـن في الفنيه .. اما انا ابي اسجل في اداره واقتصاد ..
مارديت عليها لان بالي مشغول في تركي مب فيها .. يعني معقوله تركي من هالنوع .. شلـوووووووووون .. يالله .. نمت وهالافكاار في بالي ..
وعيت وانا بردااااااانه .. فتحت عيوني بالغصب وشفت ميمي ساحبه عني الالحااف .. سحبته منها بقوه وطاحت وتمت تصيـح وانا اغطي اذني عشان انام .. بس ما قدرت هذا صياح مريم بنت راشد وين تسكت .. قمت وخذتها وسكتها وبالغصب سكتت يوم طلعت لها حلاوه من شنطتي .. ودخلت الحمام وتسبحت ولبست بيجامتي ورحت الصاله .. وشفت امي تجهز الريوق بستها على راسها ..
سألتها : يمه وين تركـي ؟؟
مادري ليـش سألتها هالسؤال مع انه مايهمني ..!
امي : تريق بسرعه وراح دوامه ..
خالي : يلا تريقي عشان اوديج الجامعه ومااتأخر ..
هزيت راسي بمعنى اوكي وانا في حلجي اللقمه ..
تريقت ورحت غرفتي بدلت ولبست عبايتي وشيلتي واخذت كتـبي وبست امي على راسها ورحت مع خالي اللي كان ينتظرني في السياره .. ورن جوالي وكان حمد اللي متصل .. ارتبكت وحطيته صامت .. خالي التفت علي ورد طالع الطريج وهو ساكت .. ارتحت لانه ما سألني .. ووصلت الجامعه ..
خالي : انا بمر عليـج هاا .. اتصلي لي اذا خلصتي ..
قلت : ان شالله ..
دخلت داخل وشفت لطوف تتلفت كأنها تدور حد .. شافتها وشافتني ..
لطوف : هااااااااا ليـش تأخرتي .. خفت عليــج ..
ابتسمت : ما تأخرت .. يلا امشي وراي امتحانين ..
لطوف : ليـش امتحانين ؟؟
قلت : واحد ما قدمته ..
لطوف : اهاا .. يلا امشـي ..
رحت وقدمت امتحاني ورحنا الكفتيريا واكلنا شوي ورجعنا .. ووقفنا عند الباب .. رن جوال لطوف ..
لطوف : هلا حمد .. ليـش ؟؟ .. زين لحظه " تكلمني " ساروه من بيوصلج ..؟
قلت : خالي .. ليـش ؟
لطوف ردت تكلم حمد : خالها .. ليــش ؟ ليش مب ياي . اووكي خلاص .. زين بااي ..
قلت لها : شنو ؟
لطوف : عادي توصليني ساروه .
قلت لها : ايه ايه عاادي افااا عليـج .. " شفت سياره خالي يايه " يلا كاهو خالي يااا ..
وركبنا السياره ..
انا ولطوف : الســلام عليكم ..
خالي يطالع لطوف وشكله مستغرب : وعليـكم السـلام ..
قلت له : خالي هذي لطوف رفيجتي ..
خالي : جارتنا ..؟
قلت : ايه ..
خالي : شلوونج لطيفه ..
لطوف مستحيه : بخــير الحمدلله . شحالك انت .؟
خالي : طيب طاب حالج ..
وخالي حط اغنيه " هلي " لراشد الماجد وقعندنا نسمع بأنصات .. ووصلنا لطوف بيتها ونزلت لبيتنا .. وكانت الساعه1 الظهر ..
دخلت : الســــــــلام عليكم ..
امي : وعليكم الســلام .. تعالي شووفي اخوج ..
طالعت تركي وهو كان يطالعني : اي اخوو ؟
امي : يبي يساافر ..
قلت في قلبي : اهااا .. يعني بتسوي اللي في بالك ياترووك .. بترووح لها ..
قلت لها : وشالمشكله يعني ؟
امي : يرووح ويخلينا برروحنا ..
قلت لها : لا يمه افا عليـج عيب تقولين هالكلام .. وخالي وين راح ..؟
امي : خالج البركه فيه .. بس ماله حايه يروح هذا ..
تركي : يمه لازم ارووح ..
امي : قلت لي كم يووم ؟؟
تركي : سبوع او سبوعيـن .. ما ادري ..
شهقت داخليا وفي قلبي : كل هذا بيتم معاها .. ما توقعتك جي يا تركي .. طحت من عيني ..
امي : وين بترووح ؟ وين بتسافر .؟
تركي : بروح الايمارات عندي شويه اشغار وبرجع ..
في قلبي : وبترووح معاها الايمارات بعد .. واحنا على الكرنيش ما تخلينا نتمشى ..
امي : متى بترووح ؟
تركي :يمه هالكثر الواحد يسأل انا رايح عندي شغل مب مجاهد ..
خالي : انزين شبيصير فيك اذا جاوبت وانت ساكت ..؟
تركي قام وبدون نفس: بعد يومين بذلف زيــن ..
قلت في قلبي : روحه بلا رجعه ..
تركي وهو رايح : ساروه ابيج تعالي ..
استغربت .. شيــبي فيني ... رحت غرفتي بدلت ولبست بجامتي وتوضيت وصليت وراحت الصاله ما لقيته .. وعقب انفتح باب غرفته ..
تركي : تعااالي انا هنـيه ..
رحت صوبه : خيـر ؟
تركي: تعالي الغرفه ابيـج في موضووع ..
وانا في قلبي : ليكوون شافني وانا اتسمع يوم كان يكلم حبيبه قلبه .. وبيهاوشني .. بس لو بيهاوشني ليش يكلمني ببرود .. يمكن يبي يعترف لي .. زين ليـش انا و هو مكفخني من كم يوم ..لا اكـــيد بيعتذر لي .. لا تركي اصلا متى اعتذر .. المهم .. قعدت على سريره .. ويا قعد حذاي .. وانا دقات قلبي تسمع فريج .. مادي خوف منه والا من الي بيقوله .. والا من قربه مني وقربي منه ..؟؟؟!!!
تركي : بدون لف ودوران والمقدمات اللي الكل يقولها .. شرايج بماجد ..؟؟
حيرني سؤاله : وانا شلي خـص بماجد وغيـره ..
تركي يعني انتي يوم شفتي ماجد اعجبج .. اعجبتج شخصيته .. ترى هو ريال والنعم فيه ..

قلت له : ما يهمني.. طالعته كأي واحد .. ليـش ؟؟ " وقلت بأستهزاء " مات .؟
تركي : مب وقت سخافتج الحين ..
وقفت : شكلك ناوي علي . وانا مافيني شده حق ضربك ..
تركي يرني من يدي وقعدني على السرير : قعدي انا ما خلصت كلامي ..
تأففت : شتــبي ..؟
تركي : ماجد اخطبج مني .. شراااايج ؟؟
انصدمت : نعععععععععععععععممممم ..؟؟ لا ما ابيه ..
تركي شكله انقهر : وليــش انشالله ..؟
قلت له بكل ثقه : مايعجبني ..
تركي : حلفي عاد ..؟
قلت ببرود : والله ..
تركي : عاد انا رديت عليه بالموافقه ..
تخصرت : ياااااااسلااااااااااااام .. عيــل ليــش شاورتني حاظرتك .؟؟
تركي ببرود ماتوقعته : لا بس حبيت اشوف رايج بالاول ..
وقفت : انا ما ابيه ..
تركي : ما يهمني رايج .. المهم الريال تقدم وخطبج وانا وافقت وانتهى الموضووع ..
قلت له وانا ماسكه الصيحه : انت لا تشووف ابوي مطلق امــي وقلت بتتصرف فيني على كيــفك .. لا حبــيبي .. انا برووح عند ابووي وبقول له كل اللي صاار ..
تركي بكل ثقه : روحي له . اللي يسمعج يقول بيعطيج ويه ..
قهرني اسلوبه وصرخت في ويهه : انا مااااااااااارااااح اتزووووج هالحيووووااان تســمع .. لو على قـص رقبتي ما راح اتزووجه ..
ورحت اركض غرفتي وانا اصيـح وسمعته يقول : بتتزوجيــنه يا سويـر بالغصـب ياسوير وبنشووف من اللي بيمشي كلامه بالاخر ..
طحت على سرير ميته من الصيااح .. ودقيت على حمد على طوول ..
حمد : هلا حبــي ..
قلت وانا ميته من الصيااح : حمـــــد بيــزوووووجووووووووني بالغــــــصب حمــد بيزووجووووووووني .. "واصيـح بصووت عالي "
حمد : شـــــنوووووووووووووو ؟؟ شتقوووولين سااااروه شتقوولين ... من بيزووجج ..؟؟ اهدي وكلميني شوي شوي .. من بيزوجج ..؟ من بيزووجج بالغصــب ؟؟
رديت عليه وانا احاول اخفف صياحي عشان يفهم انا شاقول : تركي اليوم كلمني وقال ان رفيجه خطبني منه وهو رد عليه بالموافقه .. ويوم قلت له ما ابي قال بتتزوجينه بالغصــب ... انا ما ابي اتزووجه حمد ما ابــيه ..
حمد تم ساكت .. وعقب : هالحـــــيواااااااان من قال له ان انتي ما عندج والي .. على كيفه يقرر ويوافق .. وين ابووج ..؟
قلت له : قلت له اني بقوول حق ابووي .. بس شكله ابووي ماراح يسوي شي .. حمد انا تعباانه .. تعبت خلاااااص من تسلط تركي علي .. كفايه يتحكم في طلعاتي .. بعد يتحكم في شريك حيااتي .. هنيه وبس ..
حمد : اهدي حبيبتي خلنا نتفاهم ونعالج الموضوع بهدووء ..
قلت له وانا اصيــح واشاهق : تركي بيسوي اللي في راسه انا اعرفه .. حمد انا ما ابــي اتزوووج غيــرك .. حمد انا احبــك ..
حمد : انا بعد سارووه امووت فيج .. ومستعد الحين اجي اخطبج .. بس خلنا نفتك من هذا اللي ياي يخطبج وبعدين بخطبج على طوول .. والله اني امووت عليـج سارووه ..
قلت : تمووت علي تعال اخطبـني الحيــن ..
حمد : ساروه من صجج .. الحين .؟ هالحزه .؟ وبعدين اخوج غاصبج على اللي مايتسمـى واذا انا جيـت بسبب حق روحي الاحرااج ..
قلت وانا معصبه : تسبب حق رووحك الاحراااااج وانا تسبب لي الموووووت ..؟
حمد : لا تقوليـن جي بعد عمري .. ان شالله انا ولا انتي ..
عصبت : مـااا منك فااايده . انا ابيـك تشوووووووووووفلي حــــل حق هالمصيبه ..
وسكرت في ويهه او انا منهااره .. اصيــح واصيـح .. ورحت اركض طلعت برع الحجره .. ورحت اركض المطبخ .. وشفت امي بتحط الغدا .. رحت صوبها وطحت عند ريولها وانا ميته من الصياح ..
امي تخرعت : ويــــــــــــه ساارووووووه شفيـــــــــــــج ..؟
قلت لها وانااحاول القط انفاسي وانا اصيح : يــمه تـــركــــــــــي ..
امي : شفيــــــه ضربـــــج ؟؟
قلت لها : يااااااااليته ضررررررربني يا يمــــــــــــاااااه يا ريته ..
امي بحيره : عيــــل شفيـــــــــج .؟
اصيـح وانا اصاارخ : يمــــاااااااه تركـي بيزوجني بالغصــب .. بيزوجــــــني بالغصب يا يمه ..
امي شهقت : شتقووليــن انتي .. شلوون يزوجج بالغصـب ؟؟ مب على كيفه ..
قلت لها وانا اضرب ويهي : قال حق الريال اني مواااااااافقه .. وبيرد له خبر الموافقه بعد يووووميــــن .. يمه انا ما ابيـــــــه ما ابي مااااااااااااجد ..
امي مسكتني من كتوفي ووقفتني : لا تصيحيــن ولا تسويــن بنفسج جي . انا بكلمه .. ومب على كيفه يغصبج على الريال ..
وودتني غرفتي وانا ما اقدر اوقف من الصيااح .. وخلود وريموه يطالعووني وميمي تلحق امي وهي تصــيح .. وغايوه مادري وين تطس بهالمواقف .. ودتني غرفتها وسدحتني على السرير ..
امي : رقدي انتي الحين وانا بكلمه ..
سكت لاني وايد متفائله بأمي .. اكيـد بتغيـر رايه .. بس هاي تركي اذا ما مشى اللي في باله ما يكوون تركي بن راشد ..
فتحت عيوني . بأول استغربت المكان وعقب تذكرت ان امي يابتني غرفتها .. رفعت راسي ابي اقعد حسيــت ان راســي ثقيـــل .. عوورني .. قمت بكسل وشفت الساعه 7 المغرب .. استغربت .. وانا رايحه غرفتي مريت الصاله .. وشفت غايوه وامي وميمي راقده في حظن امي والتلفزيون مسكر .. استغربت .. رحت غرفتي وانا ساكته وهم بعد ساكتيـن .. دخلت الغرفه وتوضيت وصليت العصر والمغرب .. وتميت اقرى قران لين ما اذن العشا .. وفكرت اروح الصاله بس اخاف اشوف تركي ويفتح معاي الموضوع .. فتحت الكمبيوتر .. وفتحت المسنجر وشفت 5 اون لاين .. ومن ظمنهم هاجر بنت عمــتي .. من زماااااااااان ما كلمتها ..او بالاحرى من زماااااااان مادخلت المسـنجر .. تميت اطالع المتصليـن .. كلهم صديقاتي ايام الثانويه .. دخلت علي هاجر .. استانست .. صـج اني ما اعرفها ذاك الزود بس اللي اعرفه انها احسن خوانها وخواتها ... وكان نكها .. "مجروحه الخاطر" .. وانا نكي " الحايـره "
مجروحه الخاطر : هاااي ..
رديت: هاياات ..
مجروحه الخاطر : منــو معااي ؟؟
فكرت اني العب عليها لكن مالي بارض : انا الحـاايره .. سااروه ..
ردت : هــــــــــلااااااااااااا سااااااارووووووه شلوووونج شخبااااااارج ؟؟ شمسووووووويه ..؟
ضحكت : هههههه الحمدلله بخيـر .. انتي شحالج .. من طول الغيبات جاب الغنايم ..
ردت : بخيـر الحمدلله . تصدقين من كم يوم انتي في بالي ..
رديت : ليـش ؟؟ عسى ما شر ..؟
قالت : شفت وحده تشابهج في التلفزيون .. وفكرت ازووركم ..
قال لها بلهفه : ايــــــــه تعاااااااالي واللي يسلمج هجوور .. والله اني متملله .. والجامعه وخلصت بعد شاللي معطلج ؟
هاجر : انزين انتي ليـش ما تجينا ..؟
قلت : انتي الدريول 24 ساعه تحت امرج .. اما انا وعليه علي.. الجامعه يوصلوني بالحسـره ..
هاجر : ان شالله ايكم بكره .. شرااااايج مناسب .؟
قلت لها : واااايد منااسب .. قولي حق اريـج تجي بعد ..
هاجر : لا مب قايله لها .. انتي تعرفينها فديتج .. ما تحت تروح الا بيوت ربعها هالمعفنه ..
ضحكت : ههههه وانتي وياها للحين تتهاوشوون ؟؟
ردت : ليـن باجر ..
وتمينا نسووولف وخذت رقمـي واخذت رقمها ..وسكرنا ..
الله يسلمكم هاجر هذي بنت عمتي نهله .. عمتي نهله وحده شرانيه واهم شي عندها المظاهر والفلـوس .. عندها بنتين وثلاث اولاد .. غيث البكر .. هو اكبر من تركي بـ 4 سنوات.. يعني عمره تقريبا 27 سنه .. ماتزوج للحين وهو يشتغل في شركه امه ..وبعده اريـج .. هذي شايفه نفسها وكأنها مب مصدقه ان عندها خيـر .. مب متزوجه للحيـن وهي نفس امها في الطبع .. اهم شي عندها المظاهر ومن جي محد جاها .. تبي واحد مب اقل منها تعليـم ومايجي حلو ولا خايس . مب فقير ..وتبيه غنـي .. ما اقول الا الحمدلله والشكر .. المهم وبعد اريج توأم اولاد .. ذياب وراكان .. عمرهم 23.. يتشاابهون وايد .. بس اقدر افرق بينهم لان راكان يلبس ثوب .. اما ذياب يلبس بدل .. واشوف ملامح ذياب احلى شوي .. بسوي بس لان الفرق بسيــــط ..
ذياب : متكبر وشايف نفسه وهو دلوع امه .. كل طلباته مجابه .. وهو عايف الثوب والزي الخليجي ورايح للأجنبي .. بنطلون وسلاسل وكاب وهالحركات ..
اما راكان : محامي .. كان يشتغل في شركه امه لمده سنه وبعدين طفر من تسلط امه عليه وهي ماتبي تمشي على رايه .. تبي اللي تقوله يمشي وهالشي ما عجب راكان . وطلع من الشركه واستقل في شغله .. وهو طيب غير عن ذياب اخوه .. وكل هلاشياء والمعلومات عرفتها من هجووووور اخر العنقووود .. عمرها 21 سنه طيبه وحبوبه احسن من اريج اختها ودايم اوافيها بالمسنجر .. ومن زماااااان مارحنا بيتهم ..يمكن صار لنا سنه او سنه ونـص .. بالعاده امي ما تروح بس انا وغايوه وتركي يكون من التوأم ..اما خالي مايحب يطب بيتهم .. رن جوالي وقحصت رحت صوب تلفوني .. وشفت لطوف المتصله .. اكيـد حمد قال لها ..
رديت : هلا لطووف ..
لطوف : هلا حبيبتي .. شلوونج الحين شخباارج ..
قلت لها والغصه ذابحتني : قالج حمد ..؟
لطوف : ايه قال لي .. ولا يهمج ساروه ان شالله تركي يلين راسه ..
ماقدرت استحمل صحـت ..
لطوف : بس سااروه مايصير جي .. خلاص بسج صيااح ..
قلت لها : لطوف انا بارتبط في واحد ما احبه ولا اعرفه .. لطووف انا احب حمد والله اني احبه ما اقدر اعيـش مع انسان غيـره ..
لطوف : هو بعد كان يقول لي والحزن بعيونه .. بس قال انه ماراح يسـكت ..
قلت لها باستهزاء : هه يعني شبيسوي ؟؟
دخلت علي غايوه ..
لطوف : مادري عنه . بس قال بيتصرف ما راح يسكت ..
سكت شوي ..
لطوف : ساروه حبيبتي لا تزعليـن روحج واعتبري ان ما صار شي ..
صرخت عليها : شلوووون اعتـبر ان ما صااار شــي ؟؟ وتركي قال له موافق .. ومادري بعد اذا قال ان انا موافقه والا لا .. هذا حيوااااان ما يحس ..
لطوف : ساروه انا الحين بايي بيتكم ..
قلت لها : انصحج لا تجيـن لان الجو متكهرب وماراح تستفيدين شي .. لطوف انا الحين بسكر باي ..
وما عطيتها فرصه ترد .. سكرت .. طالعت غايوه وصديت ..
غايوه : ليـش جي قلتي لها .. هي مالها خـص .. ليش تحطين حرتج فيها ..
عصبت عليها : انتــي مالج خص .. انا ولطووف ننياز ..
غايوه : لا تاكليني بـس .. كيفج والله ..
هديت شوي وفكرت بكلام غايوه .. وطرشت حق لطوف مسج .. " سوري لطووف كنت معصبه شوي .." نطرت واول ما تم التسليم ياني مسج " لا عادي انا حاسه فيج ومراعيتج "
تنهدت وانسدحت على السرير افكر بحالي ..
غايوه : مادري اقول لج والا ما اقول لج ..
قمت متخرعه حسيت ان في شي صاير : شــــــنوو ؟
غايوه بلعت ريجها : امـي كلمت تركي عن موضوع خطبتج من ماجد ..
قلت لها وانا ومتجمده مكاني : انـزيــن ..؟
غايوه : تركي عصـب وقال ملجتج بعد ما يرجع من السفــر .!!
صرخت في ويهها : شـــــنـــــــــــــووووو ؟؟ هذا على كليـــــفه ..؟
رحت اركض الصاله ابي اتفاهم معها . يظربني يكفخني يطرشني قبري اليوم عاد عندي .. ولا انه يتحكم فيني ويزوجني واحد ما اطيقه ولا احبه والمشكله اني احب غيـره ..
وصلت الصاله وانا كل همي اعفد على تركي واطيح فيه ضرب لين ما يتوب عني ويتركني بحالي .. تلفت يمين ويسار مافي في الصاله غيـر امي وخالي وريموه وميمي .. يعني تركي محد ..
قلت بكل عصبيه : ويــــــــــنه .؟
امي : بسم الله الرحمن الرحيم .. منــو ؟
قلت : تركي وييينه ..؟؟
خالي : طلع شتبين فيه ..
قلت : ابي اتفااهم معاااه .. لين متى وهو بيتحكم فيني .. توصل لمسأله الزواج ويوقف ..
خالي : ان شالله انا بقنعه ..
قلت بأستهزاء : بتقعنه ؟؟ ليـش امي ما قنعته خلااص .؟
امي : يعني شاسوي اذا اخووج عنيــد وراسه يابس ..؟
قلت : لا تسوين شي .. بس خلي حياتي تنبني على خراب وانتي شوفي لا تتعبين روحج وتساعديني ..
خالي : امج مالها خـص .. كلمت تركي غيـر جي شبتوي .. قلت لج خليه علـي ..
قلت بعصبيه : يعني امـي بتكله وانت شبتسووووي يعني .. بترقص له ..؟
خالي شكله عصب وقام وصطرنـي .. امي شهقت ويات صوبي ..
امي : مشااري شفيك عليها ..؟ مو كفااايه تركي ..
خالي قرب صوبي وشكله ندمان وانا بعدت عنه ورحت اركض غرفتي وحمدت ربي ان غايوه محد وقفلت الباب .. وقعدت على السرير .. ما اعرف اصيـح على الكف والا اصيـح على الكلام الي قلته والا اصيـح على حالتي ..؟ تميت ساكته والدموع تنزل مني بهدوء وبدون استأذان.. وعقب ما قدرت استحمل .,. انا احب حمد ما اقدر اتزوج غيره .. ماااااااااااااقدررررررررررر .. وتميت اصــيح بصووت عالي وانا اضرب الارض .. لين ما حسيت ان يدي

بتنكسـر .. غطيت ويهي بيدي وتميت اصيــح .. اسمع تلفوني يرن .. بس مابي ارد على حد .. وسمعت صوب طقه باب .. ومن بعدها ماحسيت بروحي ..
فتحت عيوني وشفت امي تصـيح وخالي واقف جنبها وغايوه قاعده جنبي .. والتفت ادور تركي للحين فيني حره عليه ابي اصطره .. امي يات صوبي ..
امي بخوف : يمه شفيـج شسويتي بعمـرج ؟
مارديت عليها .. قامت دموعي تنزل وانا سااكته ..
امي تكلم خالي : مشااري شووفها ما ترد ما تتكلم .. ليكوون قصت لسانها .. وي بنتـي .
وتمت تصيـح ..وغايوه تصيـح ..
غايوه تصطرني بالخفيف على ويهي : سااروه .. سااااروه .. قولي شي لا تخوفين امي عليـج .
تمت دموعي تنزل وانا اطالع السقف ..
مشاري يا صوبي : ساره .. ساره قومي نوديج المستشفى .. امشـي ..
صرخت عليـهم : طلعووووووووووووووووو بـــرع مااااااااااا ابي اشوووووووف حد طلعووووووووووو ..
امي بفرح : انطــــقت ..
خالي مسكهم من يدهم وطلعم برع وسكر الباب ودخل علي ..
قعد على سريري مجابلني .. شفته وصديت الصوب الثاني ..
خالي : شاللي مضاايق .. سألت عنه وطلع ماجد ريال زين ومـ ...
قاطعته : انا ما ابيه انتو تفهموون والا لا .. ما ابيه ولا ابي غيـره .. انا لو الموت ما تزوجته .. خلو تركي ايي ويذبحنـي وافتك من الدنيا .. خله يذبحني ويقول له ماتت ويفتك مني وافتك منكم كلكم ..
وتميت اصيـح بصوت عالي ..
خالي مسك يدي : ساره خلاااص .. بسج صياح .. وان شالله ماجد ماراح تتزوجينه .. انا بكلم تركي ما رااح ارقــص له ..
تذكرت الكلام اللي قلت له وضحكت : هههههههههههههههه اسفه خالي والله كنت معصبه وما اعرف شاقو ل ..
خالي : ههههههههههههههههه حتى انا اسف لاني سطرتج انتي بروحج مب ناقصه ..
اعتدلت : خالي واللي يسلمك سو ا شي يمنع هالزواج ..
خالي : رقدي وانتي متطمنه ..
ابتسمت مرتاحه ..
خالي : انتي ما اكلتي شي من قمتي صـح ..؟
هزيت راسي بمعنى ايه ..
خالي : قومي يلا امج مسويه خوووووش عشاا ..
قلت : مالي نفس خالي ..
خالي : لا بتقومين وريلج فوق رقبتج ..
ضحكت : هههه عيل شلوون انزل ..؟
ضحك : ههههههههه انا بشيلج .. ههههههههه يلا قومي ..
قمت وانا مييييييته من اليووع ..
ورحت الصاله وشفت الكل متجمع ما عدى تركي ..اكيد راح لها الدقس .. قعد احذى امي .. ابتسمتلي وابتسمت لها ..
امي : احط العشاا ؟؟
غايوه : عيـل بتذبحينا يووع ..
خالي : جاان فيـج خيــر روحي انتي حطيـه شاطره تتأمريـن ..
قمت : انا بروح احطه ..
امي : لا انتي تعباانه .. انا برووح وغايوه بتجي معاي ..
غايوه : قالت لج انزين بتروح هي تحطه تتعبين نفسج وتتعبيني ليـش ..؟
خالي: غااااايوه ووجع .. قومي جدامي اشووف ..
غايوه قامت : زين لا تهاوش ..
خالي : ما يخصج ..
غايوه وهي رايحه صوب المطبخ : هذا يزااي خايفه على بلاعيمك ..
ضحكت وقعد جنب خالي .. وحطينا على قناه فتون وتمينا نطالع ونضحك .. وشوي الا جات امي ومعاها الاكل ورحت اساعد غايوه في المطبخ ..و حطينا العشا في الصاله وكلت بشراهه لاني ما كلت شي من رجعت من الجامعه .. وشبعت وحسيت ان بطني بينبط .. شلينا الاكل وديناه المطبخ ورحت غرفتي وكنت حاسه ان تلفوني بينفجر من المكالمات .. طليت فيه ولقيت 15 مكلمه .. كلها من لطووف وحمد واستغربت يوم شفت رقم هاجر .. توني بظرب حق هاجر الا هي متصله ..
قلت : احم احم .." رديت " الوو ..
هاجر : هلا والله بشيخه البنات سويره ..
ضحكت : هههههههههههه هلا فيـج . شخباارج وشخباار الكل ..
هاجر : انا الحمدلله بخـير بس متملله .. اما الباقي مادري عنهم ..
قلت : ليـش ماتدرين عنهم ..؟ مب كلكم في بيت واحد ؟
قالت : ايه .. امي 24 ساعه برع او عندها ناس .. وابوي تدين شفيه وكله في غرفته .. اما ذياب ما يقر في البيت وراكان نفس الشي وغيـث مسافر وبعد يومين بيرجع ..
قلت لها : واريــج ؟
قالت : اروويج قاعده على النت اشوف ايميلها عندي ..
قلت : يحليلها . سلمي عليها ..
هاجر : تنجلع الخايسه مب مسلمه عليها ..
قلت : بعد متهاوشه معاها ..
هاجر : لا بس للحين محتره عليها يوم خذت جوالي .. الحين رفيجتي يايبته لي هديه تاخذه هي ليــش ؟
قلت : ههههههه هدي وقولي السالفه ..
هاجر : الحين مريوم رفيجتي يابت لي جوال حق عيد ميلادي .. وهو مب موجود في قطر يايبته من دبي .. وانا ينيت عليه وماخليت حد في البيت ما رويته .. وشافته الزفته وخذته ..
قلت : زين ليـش خليتها تاخذه ..
هاجر : مادري .. انا كنت نايمه وهي خذته يوم كان يجرج وحطت فيه كرتها وماخلت حد من رفيحاتها ما روته .. والقهر انها قيله لهم اني انا يايبته لها هديه .. يااااربي مب تقهر سااروه ..
قلت : زين ليـش ماتاخذينه منها ؟؟
هاجر : تخــسي .. انا اخذ الجوال الي خذته منـي ..
قلت محتاره : عيـل ليـش معصبه منها ..
هاجر : ليـش تاخذه .. هالطبع قهرنـــي ..
قلت : خلينا من اريج الحين .. وقولي لي شمسويه .. وبشريني خذتي نتيجتجه الجامعه .؟
هاجر : لا بكره بتطلع نتيجه كم ماده مب كلهم ..
قلت : انا بعد .. بكره بتطلع الله يستر ..
وتمينا نسولف واستانست على سوالها .. سوالفها عفويه ومافيها تصنع وعياره ..وهذا اللي حببني فيها .. رحت الصاله لان اجاني نوم .. شفت خالي يطالع فلم وخالد منبطح على بطنه يطالع معاه .. غريبه هاد البلاي شتيشن وقاعد يطالع التلفزيوون .. قعدت جنب خالي وتميت اطالع الفلم وكان اكشن وضرب مضارب .. استانست على الفلم واندمجت فيه .. وفجاه انفتح باب الصاله .. التفتت شفت تركي توه راجع من برع وشكل مزاجه عاال العال .. خالي طالعني على طول وانا طالعته .. ووقفت ..
تركي : الســلام عليــكم ..
خالي : وعليـكم السـلام ..
تركي : والعرووس ليـش ما ترد ؟
قلت له بسرعه : انا مب موافقه على ماجد .. ووصل له هالكلام ..
تركي : ياماما انا وصلت له الكلام اللي في بالي خلاااص ..
بطلت عيووني على الاخـر : شقلت له ؟؟
تركي : قلت له البنت موافقه والملجه بعد ما ارجع من السفـر وبيسوي لج عرس لا صار ولا استوى ..
صرخت : ماااااااااابيييييييييه ماااااابييييييييييه .. تفهم والا لاااااا ما اابببببببببببيه ..
تركي : شوي شوي على حنجرتج ماما .. شوفي انا اعرف مصلحتج وماجد ريال طيب وشهم وعنده خيــــر خيــــر عنده .. يعني بيعيشج ملكه والخدم يحوطون حواليج ينتظرون منج طلب وااحد .. وغيـر جي اذا تزوجتيه بيعيني نائب مدير العاام ..
قربت منه وصطرته .. مادري شلون ياتني هالجرأه .. بس ما هقيت اخووي الي مالي غيـره يبيعني عشان الفلوووس .. يبيــع اخــته عشااان الفلووووووس .. صج ان الفلووس تغـير النفوس ..
تم وافق مكانه منصدم وانا تميت اضربه بصدره واصـيح : حقيـــــــــر حقــــــــير واااااطي ..
خالي يا بسرعه ومسكني من ذراعي وبعدني عنه .. وتركي ياي يبي يضربني وخالي وقف في طريـجه ..

تتوقعووون بتكبـر السالفه والا راح يسكرها خالي ..؟
هل بيتسكر موضوع الزواج من هاللحظه .. والا تركي بيعاند ..؟
واذا عاند انا شبااسوي ؟؟ باستسلم والا راح اجازف اكثـر ؟؟
كل ها في

الجـ الرابع ـزء ..

تركي : مشااري قوووووم عني خلني اعلمها الادب ..
مشاري : تركي روح غرفتك .. رووووح عنها يا اخي مالك شغل فيها ..
تركي : انا اخووووووها شلوووون مالي شغــل فيها .. ما شفتها شلوون سطرتني كأني اصغر عيااااالهاا ..
ودز خالي ويا صوبي وتوه بيمسكني الا خالي ساحبه عني وعطاه بكـس على حلجه .. وتم حلج تركي ينزف دم .. وتركي وخالي قاموا يتكافخون وانا اصاااااارخ .. واصـيح .. يات امي وغايوه يركضوون .. امي شهقت ويات في وسطهم وبعدتهم عن بعض ..
امي خايفه : شفيـــــكم ينيــتو .. شصاااااااار ؟؟
تركي : هذا ماله شغلي بيني وبين اخــتي .. ماااااله شغل .
خالي معصب : انت اللي مالك شغل فيها .. عنده ابو وعندها ام .. انت محد سمح لك تتصرف فيها وكأنها سلعه ..
تركي عصب وراح غرفته وطلع بشنطته ..
تركي : الزواااااااج بيتم يعني بيـــــــتم ..واعلى مافي خيلكم اركبوووه .." وطلــــــع "
شهقت ومسكت حلجي بيدي : ماااااااااراح اتزووجه ..وشووف شلوون ماجد بيتزوج بدون عروس ..
ورحت اركض غرفتي ودخلت وقفلت على نفسي الباب وقعدت اصيـــح .,.بس غايوه كسرت خاطري ..مسكينه كل ماقفل الباب ترقد عند امي .. فتحت قفل الباب وانسدحت على السرير .. غايوه طقت الباب ..
قلت وانا اصيـح : الباب مفتووح ..
فتحت غايوه الباب ويات صوبي .. وتمت تطالعني وانا اصيــح ..
قلت وانا تصيـح : غايوه انتو حاسيـن فيني ؟
غايوه تهز راسها بمعنى ايه ..
ما قدرت صحت زياده ويات ظمتني وقعدت تصيـح وياي .. عقب فجيت عنها ورحت الحمام وغسلت ويهي ورحت الصاله .. وشفت امي عند خالي وتمسح عنه الدم اللي ينزف من خشمه وحلجه ..
امي تصيـح : ليـش ضربته ليــش ..؟
خالي ساكت ..
قلت : تركي يستاااهل الذبـح ..
امي ردت على طوول : انتـــي سكـتي ولاااااا كلمه .. انتي السبب في الي قااعد يصيــر ..
قلت وانا كاتمه صيحتي : ليــش انا شسويت ..؟
امي : لا ماسويتي شــي .. اخووووج طلع من البيــت معصب والله يعلم بيرد لنا والا لا .. وسويتي عدااوه بين خالج وتركي ..
خالي : ما عليج فاطمه .. بكره تركي بيرد وكل شي بيرد نفس اول ..
قلت : خالي انا ما ابي اتزوج ماجد .. مااا ابي ..
امي : ليـش ماتبين تتزوجيـنه يعني ..؟ تركي يقوول ان الريال ما ينعاااب ..
قلت : رياااااال حق نفسه .. والله لا تحدووني اوصل حق رقمه بأي طريقه واقووول له اني ما ابيه ولا ايجي ويتقدم لــي .. والله ترى اسووووووويها ..
خالي : شفيــج انتي جنيــتي ..؟
قلت وانا اصاارخ : بين من فعاايله هالحقيــر الانااني .. ما يفكر الا شلوون يسعد نفسه .. ما فكر فيني وفي مشااعري ..ما فكر الا بالفلووس ..
حسيت ان احبالي الصوتيه انقطعت من الصراخ .. والفريج سمعوني ..
خالي : لا تصاارخيـن .. واللي فيه الخيـر الله بيجدمه ..
قلت : انا ما شفت حد في حيااتي جي باارد مثلك .. الحين بنت اختك بتنغصب على واحد ما تبيه وانت قاعد ..
امي عصبت : يعنـــي شتبيــنه يسوووي ..؟ يروح يذبح اخوج ويذبح الرياال .. اكثر من جي ما يقدر يتصرف ..
قلت : والله اكــلم ابوووووووي انا ما رااح اسكـت ..
ورحت اركض واخذت جوالي واتصلت حق ابووي بدوون تردد ..
رد : الوو ميـن ..؟
استغربت الصووت : الووووو ..
رد : مين معايه .. عاوزه ميــن ..
سكرت في ويهه وتميت اصيــح .. ليــش جي يا يبـه .. حتى اتصاال ما تبينا نتصـل .. كنت باتصل بعمتي يمكن تعرف رقمه واول ما رن .امي يات وخذت مني الجوال وسكرت ..
قلت لها : ليـــــــــــش ؟؟
امي : ابووج مايخصه .. وقلت لج اذا تركي يبي شي محد يقدر يوقفه .. لا انا ولا ابووج ولا حد ..
صحت : يمه انا مب بنتج .. ليـش جي تسوين فيني ..
امي يات قعدت جنبي : يمه انا ما اقدر اسوي اكثر من الي سويته .. ويمكن يطلع ماجد ريال والنعم فيـه .. انتي ما تدرين ..
قلت : ويمكن يطلع مب ريال ونفس تركي .. انا شاسوي عقبها ..
امي : خالج سأل عنه والكل مدحه ..
قلت : بــس انا ما ابيه ..
امي : ممكن تعطيني سبب واحد يخليج ترفضيـنه ..
قلت في قلبي .. احب حمد .. وهذا اهم سبب يخليني ارفضه ..
امي : ليــش سكتي .؟؟
قلت : يمه انا ما ابيه خلاااص . الزواج مب بالغصـــب ..
امي قامت : بس تركي ما يفهم هالشي .. اللي في راسه بيسويه ..
حطيت يدي على راسي وتميت ساكته .. ما ابي اصيـح وماعرفت شلون اعبر عن مشاعري لا بصياح ولا بكلام .. لان مهما بتكلم وبقوول محد بيفهمني ..
طلعت امـي .. واتصلت حق حمد على طووول ..
حمد : هلا حــبي ..
رديت : اهليـن ..

حمد :شفيج .. صوتج حزيـن ..
قلت : لانهم غاصبيني بعد شفيـني .؟
حمد : لا يهمج حبيبتي .. انا انطر امي تجي من السفر وبكلمها عن هالموضووع وان شالله اجي اخطبج على طوول ..
قلت بيأس: لا تتعب روحك .. امك بترجع بعد شهوور .. وانا ملجتي بعد سبوعيـن ..
حمد منصدم : واااااااافقـــــــتي ؟؟؟؟؟؟
قلت : قلت لك غصــبوووووووني .. وما اقدر اسوي اكثر من اللي سويته .. حمد اذا انت تحبني تصـرف .. والا حبنا بيضيـع ..
حمد : ساروه ما في الا انطر امي وامي بترجع بعد سبووع اكيد بلحق عليج قبل لا تملجيـن ..
سكت ..
حمد : تعااالي .. الحين هاي اللي ما يتسمى ماجد .. خطبج رسمــي ..؟
قلت : مادري عن شي . هو خطبني من تركي وتركي قال له اني موافقه ..
حمد : حيــوووااان ..
قلت : يه انت بس شاطر تسـب .. اما اذا قلت لك تعال ساعدني.. تعذرت لي بأمك .. انا بتزوجك انت والا امـك ..
حمد : بعد لازم امي تكوون موجوده .. والا اخطبج بدون علم امي وتنصدم .. وترى امي فيها القلب يعني ماتستحمل صدمات..
انبطت جبدي من بروود حمد : حمد انا تعبانه .. باي ..
وسكرت على طول لان اسلووبه قهرني.. الحين انا بعد اسبوعين بصيـر حرم ماجد وهو عادي عنده .. آآآآآه يالقهر ..
شفت الساعه 10 .. انسدحت على السرير ويات غايوه تركض ..
غايووه : سااروووووه ..
خفت : هاا شنوو ؟؟
غايوه قعدت على سريرها وحاظنه يدها : بكره النتاااااااايج ..
قلت : نتاايج شنووو ؟؟
غايوه : نتايج امتحاناتي بعد شنوو .. نجوي بنت خالتي زينب قالت لــي .. سااااارووه والله خاايفه ..
قلت : ان شالله مبيضتها ..
غايوه : ان شالله ان شاللـه .. ابي ارووح الجامعه واكمل واردس برع ..
ضحكت ضحكه استهزاء : هههههههه اذا ما زوجج تركي ما اكوون انا ساره بنت رااشد ..
غايوه : ايــــــه لا تفااوليــن علـي ..
قلت : انا ما افاول .. بس اقول اللي يبي يسويه .. انا كان حلمي ادرس برع واكمل دراستي واحب زوجي قبل او بعد الزواج .. بس ما اعتقد هذا يصيـر ..
غايوه : انزين يمكن تحبينه بعد الزواج .. انتي ا تدريـن ..
تميت ساكته .. افكر اقوول لها والا ماا اقووووول ..؟
قلت بتردد : غـ .. غااايووه ؟
غايوه : هاا .؟
قلت : بقوول لج شي بس يكون سـر بيني وبينج ..
غايوه لزقت فيني : قوووولي افاا عليج سرج في بيـر ..
قلت : انا احب واحد ..
غايوه شهقت : منـــو ؟؟
قلت : حمد اخو لطووف ..
غايوه تمت سااكته ..
غايوه : عشاان جي ماتبين تتزوجين ماجد ..
قلت لها : مو هذا السبب الوحيـد .. اصلا هذا ماجد انا شايفته اكثـر من مره ونظراته لي ما اعجبتني وهو اصلا ما عجبني ..
غايوه : بالعكس اشوف وجهه مقبول يعني لا شين ولا زين ..
قلت : خذيه انتي زين .
غايوه : لا لا لا انا وراي دراسه .. وما ابي اتزوج الحين .. بس ما قلتيلي شلوون حبيتي حمد .. وشلون وين عرفتيه ..؟
نتهدت : شوفي .. حمد كانت اول علاقه لي فيه .. كنت اكلم لطوف على التلفون .. وهو طرشها مادري شتسويله وكلمني .. صج طول المكالمه هواش .. بس عجبتني شخصيته .. ودمه خفيف .. وعقب انتهت المكالمه يوم سبني .. هههه مادري شالسبب بالظبط بس سكرت في ويهه .. وياتني مكالمات من رقم غريـب .. وعقب اتصل مره ثانيه وكان يبي يعتذر .. وتمينا نتهاوش بعد وعقب طرش لي مسـج يعتذر .. وبصراحه استانست .. وشفته مره فوق السطح وانا انشر الثياب ..
غايوه : ااااااااهااااااااااا من جي كله تتهاوشين معاي تبين تنشرين الغسيــل ..
قلت : لا انا بديت اكلمه يوم كانت عندج امتحانات ..
غايوه : يعني ما طولتووو ..
قلت : لا .. بس كل يوم يتصل لي وانا ارد .. بس كنت ارد عليه من الملل والفراغ .. ولطوف تدري .. لاني انا قلت لها وغـير جي حمد بعد قال لها .. وكانت لطوف هي مرسال الغرام من بينا .. وحبيته .. ويوم تعلقت فيه .. ياني تركي الاخ وقال لي عن هالسالفه الي مب ناويه تعدي ..
وانا يوم كنت اتكلم.. اتكلم وانا اطالع الفراغ ..
قلت : تحملــي غايوه تسوين نفسـي .. ترى انا غلطت .. بس ما اقدر اصحح غلطتي .. لاني تعلقت فيه بدرجه ما تتوقعينها ..
رن جوالي ..
غايوه تطل : من حمـد .؟
قلت : لا هاجر ..
رديت : هلا هااجر ..
هاجر : اهلــين .. يعني اذا انا ما اتصل انتي ما تتصليــن ..
انحرجت : سوري والله بس عندي ظروف شوي ..
هاجر : خـير ان شالله ..
اعتدلت وقلت لها السالفه كلها ..
هاجر : ليــش ليش تركي يسوي في جي ؟؟
قلت : والله مادري يا هجور .. تصدقين فكرت اشرد من البيت ارووح عند ابووي .. بس ابوي مغير رقمه وما اعرف عنه شي .. عندج رقمه هجوور ..
هاجر : لا والله اصلا ابوج اللي هو خالي من زماااان من جانا ..
قلت : والله اني محتاجه له .. ابيه يتصرف يسوي شي .. انا ما ابي مااااجد ما ابيه ..
هاجر سكتت ..
قلت : الوووو هجوووور ..
هاجر : هاا .
قلت : وين رحتي .؟
هاجر : افكر بشـي .. وبتكونين جريئه اذا سويتيه ..
قلت : يعني هالشـي بيفكني من زواجي من ماجد ..
هاجر : ايه يمكن ..
قلت اترجاها : قوووولي واللي يسلمج ..
هاجر : شراايج تشرديــن ..
قلت : ايه وين ارووح .؟
هاجر : تجيـن بيتنا .. وقلتي ان تركي بيسافر سبوعيـن وبيرجع .. انتي تعالي بيتنا قبل لا يرجع .. شرااايج .. ترى هاي الفكره الوحيـده اللي بتفكج من شر اخوج ..
تميت افكر : لا لا لا لا لا هجور .. شلون اروح بيكم .. فشيله ..
هاجر: لا حبيبتي مب فشيله ولا شي ..ترى بتنتظريــن حمد لين ما يجي يخطبـج ..
قلت : اوكي هاجر بفكر وبرد لج خبر .. اووكي ..
هاجر : اوكي حبيبتي .. وترى هالفكر اشوفها هي الفكره الوحيده اللي بتنقذج من اللي انتي فيه ..
قلت : ان شالله بفكر عدل وبرد لج ..
هاجر : اوكي حبيبتي .. تامريني بشــي .؟
رديت : سلاميج ..
هاجر : مع السـلامه .
انا : في اماان الله ..
وشفت غايوه اللي كانت تطالعني وهي مستغربه ..
قلت : شفيـج ؟
غايوه : قالت انج تجيـن بيتهم ..
قلت : ايه شفيها .. اجي بيتهم ليـن ما يخطبني حمد .
غايوه : ومتى ناوي يخطبج حمد ان شالله ..
قلت : اذا ردت امه ..
غايوه : والله اشـك ان هالريال يقـص عليـج .
قلت : لااا حرام عليـج .. حمد غـير عن كل الشبااب .
غايوه : سكتي سكتي ابي ارقد ..
سكرت الابجوره اللي عند راسي وتميت العب في شعري وافكر باللي قالته هاجر لين ما رقدت ..
وعيت على صراخ ميمي .. حاولت ارقد ما قدرت .. قمت غسلت ويهي وتوضيت وصليت الظهر .. ورحت الصاله وشف الانسه مريم قاعد على الارض تصيـح وهي مغطيه ويهها .. قربت منها وشليتها وتميت ابوووسها..
قلت لها بحنان : شفيــج حببتي .؟ من طقج عشان اطقه ..؟
ميمي تأشر على ريمووه ..
حطيت ميمي على الكرسي ورحت حق ريموه يوم قربت منها شردت وتميت اركض وراها .. وطلعت برع الحوش وركضت وراها .. ايه ليـش تطق ميمي حبيبه قلبي .. ووصلت عند قفص الحمام .. وتدري ان هاي نقطه ضعفـي .. اخااف من الحمام ..
قلت وانا القط انفاسي : تعاالي ..
ريموه وهي داخل القفص : والله اذا قربتي صوبي احذف عليج حمامه ..
قلت : والله ان حذفتيها علي بكسر بيظهم ..
ريموه : لاااااااااااا .. والله ياويلج ..
شوفوووووو .. بعد تهدد .. صج قويه عيـن ..
قلت : ليـش ضربتي ميمي ..؟
قالت : والله ليش تكت الكورنفليكس مااالي وتخلي امي تهااوشتني .؟
قلت : تستاهليـن .. حد قال لج تتريقيـن الظهر وقت الغداا ..
ريموه : والله كيفي ..
قلت لها وانا رايحه : اراويج يام لساان ..
سمعتها تقوول : يعني انتي ما عندج لساان .. يا ام عيـن زيـن..
ضحكت عليها ودخلت داخل لقيت غايوه بعبايته وتبوس امي ..
قلت : خـير خيـر انا مالي نصيــب ..
وكأنها ماصدقت يات عندي وبوستني ..
ضحكت : شالسالفه شصااااااير ؟؟
غايوه : ساااااااروووووه نجحت نجححححححححححت ..
صرخت : مبـــروووووووووووووووك مبرووووك الفال لــي ..
امي : امــين افرح فيكم كلكم ..
ودخل خالي وكان توه راجع من الدوام .. باسته غايوه .
خالي ابتسم : خيـر شالسالفه .؟
لان احنا ما نبوسه او نسلم عليه الا اذا غاب فتره ..
غايوه : خااااااالي بااااارك لـي نجــــــحت .. نجحت ..ونسبتي 92%
خالي مبتسم : مبرووك مبروووووووك .. عقبال الجامعه والدكتوراه ..
غايوه رافعه يدها : آآآآآمــــين ..
امي : بكره باعزم خالتج .. عشان نجحتي ..
قلت والغيـره بتذبحنـي : وانــــــــــــــــا ؟؟
امي : انتي ان شالله بتنجحيـن ..
قلت : ما تسون عزيمه الا اذا خذت نتيجتي .
خالي : لا اذا خذتي نتيجتج العزيمه علي انا ..
لزقت فيه : فديــــــك .. فد و فد ..
وتجمعنا في الصاله ورحنا انا وغايوه نساعد امي في المطبخ .. وكان الغدا مكرونه بالبشميـل يمي يمي .. وحطينا الاكل هالمره في المطبخ .. وتمينا ناكل .. وامي مسكت التلفون وكلمت خالتي وبعد نجوى بنت خالتي نجحت .. ونسبتها 75% .. ما شدت حيلها كثـر غايوه فديتها .. مع ان نجوي يدخل مدرس من عندها ويطلع مدرس .. بس اللي قلبه على الدراسه غيـرعن اللي قلبه في اللعبه .. وعقب رحت غرفتي واتصلت حق نجوي ابارك لها وعقب كلمت نور اختها الكبيره .. عمرها 21 ..
اعرفكم عليهم ..
نجوى بنت خالتي زينب .. كبـر غايوه اختـي وكانوا يدرسون في مدرسه وحده .. ونور اكبر من نجوي عمرها 21 دلووووووووووعه ابوها وهي اللي دايم اسولف معاها .. وجاسم يبجي فوقها عمره 23 سنه .. .. دمه خفيف و من عرفه وهو ما يقعد في البيت .. 24 ساعه برع .. واللي فوقه نوف .. عمرها 25 سنه .. وهي متزوجه وتموت عل زوجها وماتجي بيت امها وايد .. وخالد البكر عمره 28 سنه .. ويشتغل وعنده حرمه .. اسمها حصـه .. وكان متزوجها عن علاقه . وللحين ما يابو عيال وهو يموت عليها ..
يحظه تزوج اللي يحبها وتحبه .. الله يحنيهم .. ما اقوول الا الله يصبرني .. رحت الصاله وحطيت على على دبي وشفت برنامج للاغاني.. وحاطيـن اغنيه الجديد للراشد الفارس .. وتميت اسمعها واعجبتني .. وفريت وحطيت على روتانا كليـب وتميت اسمع اغانيهم .. وعقب حطو اغنيه نجحنا والله وفقنا لأحلام .. طولت عليها وغايوه يات تركض .. كأن الاغنيه تناديها .. يات وتربعت وهي مستااااانسه .. وامي يات وهي مستانسه ويات ميمي ترقص ويات ريموه بعد وتمت ترقـص وانا قمت وارقص معاهم وغايوه قامت وتمينا نرقص واحنا نضحك .. قام خالي لانه كان نايم ..
خالي يعلي صوته عشان نسمعه : قــــصروووووو ايه ..
ضحكت : خااااالي تعال ارقـص معانا ..
خالي هز راسه بالنفي وراح غرفته وسكر الباب ..
وتمينا نركص مع ان الاغنيه ما ترقـص وايد .. بس احنا كنا مشتطيـن .. وشليت مريوم وتميت ابوسها وارفعها وارد امسكها . ويا خالد مستغرب من الوضع .. وتم يطالعنا وهو مبتسم .. غايوه مسكته من يده وتمت ترقص معاه وهو منحرج .. وغايوه تغني معاها ..
امانينا رسمناها .. بعوون الله وصلناها ..بذلنا بالعطا حبنا .. حصدناها بلا تقصيـر .يــــلااااااااا
وخلصت الاغنيه .. وحطو اغنيه حزينه ..
غايوه : ياااااا متفرغيــن .. خلهم يحطوون اغنيه ربشه .. خلني ارقص فيني رقـــــص ..
قلت : انا بعد ..
رحت اركض الغرفه ويبت المسجل وطلعت شريط من سياره خالي .. وكان معلايه .. وحطيت دقنــي وتميـنا نرقص وامي تطالعنا وهي مبتسمه .. وخالد يطالعنا وشكله منحرج وريموه طلعت تعرف ترقص الملعونه .. وميمي من الوناسه والربشه تمت تدور في الصاله وهي تصارخ من وناستها .. وعقب انا تعبت وقعدت .. وفي هاللحظه دخلت خالتي علينا وفي يدها كيكه ونور ماسكه اكياس ونجوى بعد .. غايوه شكلها انحرجت وقعدت على طول .. وانا حمدت ربي اني قعدت قبـل ..

كذا اكون خلصت ابي حماس عشان انزل باقي الرواية

ايه دا الموضوع القمييل😍❤
دايما مواضيعگ حللوةة زييك❤

ششكرا ع الموضوع الخوقاقي

يعطيك العافية تقبلي مروري
شكرا لك مرة تانية في انتظار جديدك

حـڪـا يـه? ♥ تسلمي الراويه حلوه بس لسه ماخلصتهااا
الف شكر القصه كثيرر تجنن وتقبلي مروري

واههووو روايهه تجنن قريتها كلهها نيين سارت عيونهه حمرهه هييعع
اشكركك من اعمااق قلبي عع الرواايهه
انتظر روااايتكك بأحر من الجمر

قصة رائعة بس كمليها لان مايسير تكون كيذا اذا كتبتيها ذا شي رائه اما اذا لقيتيها بموقع فارجوا ان تقولي اسم الموقع او تطعينا رابط الصفحة لكي نشاهد باقي القصة لانها رائعة جدا